Qaraqalpaqstan Respublikası Ministrler Keńesi

Prezident basshılıǵında 2028-jılǵı Olimpiada hám Paralimpiada oyınlarına tayarlıqtı kúsheytiw, ǵalabalıq sporttı jańa basqıshqa alıp shıǵıw máselelerine baǵıshlanǵan videoselektor májilisi baslandı.

"Óz aldına ullı maqsetler qoyǵan 
xalıq tek ǵana salamat hám kúshli bolǵan jaǵdayda ǵana 
kózlegen sheklerine erise aladı. El-jurttıń salamat bolıwı, úlken islerge qábiletli bolıwında bolsa, sózsiz, 
dene tárbiya hám sporttıń áhmiyeti teńsiz.

Búgin biz dúnyaǵa ashıq, sociallıq hám ekonomikalıq rawajlanǵan mámleket - Jańa Ózbekstandı qurıw
 boyınsha óz aldımızǵa úlken maqsetler qoymaqtamız.

Hár bir insan, hár bir ata-ananıń ármanı hám niyeti fizikalıq hám ruwxıy jetik áwladtı tárbiyalaw bolıp tabıladı. Bunıń ushın bolsa dene tárbiyası hám sportsız erisiw múmkin emes.

Bir sóz benen aytqanda, sport - salamat xalıq, salamat jámiyettiń tayanısh baǵanası bolıp esaplanadı. 
Sonıń menen birge, sport - bul eń aldı menen tınıshlıq elshisi, hár bir mámleket ushın milliy maqtanısh deregi,"

- dedi mámleketimiz basshısı sóziniń basında. 

Keshe qısqı Aziya oyınlarında sportshılarımız sońǵı 26 jılda birinshi márte figuralı ushıw boyınsha juplıqlar arasında altın medaldı qolǵa kirgizgeni mámleketimiz sport tariyxında jańa bet boldı.

Sonıń menen birge, futbol boyınsha Ózbekstan amputantlar saylandı komandası Bangladeshte ótken Aziya chempionatınıń jeńimpazı boldı.

Tailandta velosport hám para velosport boyınsha Aziya chempionatında jaslarımız ulıwma komandalıq esapta 1-orındı iyeledi.

Prezidentimiz barlıq sportshılarımızdı, olardıń trenerleri hám ata-anaların qolǵa kirgizilgen joqarı jetiskenlikler menen qutlıqladı. 

Májiliste atap ótilgenindey, sport tarawın tek ǵana oyınlar hám jarıslar emes, millet genofondı, mámlekettiń qúdireti hám abırayın pútkil dúnyaǵa tanıtatuǵın eń tásirsheń qural, eń tiykarǵı wazıypa dep biliwimiz shárt.

Sol sebepli Olimpiada hám Paralimpiada oyınlarına tayarlıq boyınsha birinshi márte bunday úlken májilis ótkerilip atırǵanı atap ótildi.

Reformalardıń dáslepki kúnlerinen baslap basqa da tarawlar qatarında dene tárbiya hám sporttıń rawajlanıwına da úlken itibar berilmekte.

Sońǵı tórt jılda byudjetten sportqa ajıratılıp atırǵan qarjı 1,5 trillion sumnan 3 trillion sumǵa arttı, trenerlerdiń ortasha miynet haqısı 2 esege kóbeydi, 101 iri sport obekti jańadan qurıldı, 67 si rekonstrukciyalandı.

Sportshılarımızdıń Parijde erisken jetiskenlikleri bul reformalardıń ayqın nátiyjeleri bolıp esaplanadı.

Eń tiykarǵısı, bul nátiyjeler jaslarımızdıń, ata-analardıń sportqa bolǵan múnásibetin ózgertti. Kóp jaslarımızda "Men de chempion bolaman," degen kúsh-ǵayrat payda boldı. 

Parijde erisilgen nátiyjeler menen qanaatlanıwshılıqqa berilmew kerek ekenligi kórsetip ótildi.

Los-Anjeles-2028 Olimpiada oyınlarında kúshli onlıqqa kiriw maqset etilgen. Onıń ushın juwapker basshılardan baslap, rayon hákimlerine shekem hámme qattı islewi kerek ekenligi atap ótildi.

Olimpiada oyınlarındaǵı tariyxımız tek ǵana jeke gúres sport túrleri menen jazılıp atırǵanı kórsetip ótildi. Ótken Olimpiadada tek ǵana 5 sport túri - boks, dzyudo, taekvondo, awır atletika hám erkin gúres boyınsha medal qolǵa kirgizilgen.

Sport federaciyalarınıń hár birine ministrler hám respublikalıq shólkemlerdiń basshıları saylanǵan, biraq, ayırımlarınıń jumısı bar potencialǵa sáykes emes ekenligi atap ótildi.

Wálayat, rayon, máhállege barǵanda, sportshı hám trenerler menen ushırasıw, olardıń mashqalasın sheshiw, sırt el yamasa xalıqaralıq federaciyalardıń basshıları menen birge islesiw, sportshı hám trenerlerdi oqıw shınıǵıwlarına jiberiw jumıslarınıń tómen ekenligi sınǵa alındı. 

Prezidentimiz bar potencial tolıq iske qosılmay atırǵan sport túrlerine ayrıqsha toqtap ótti.

Máselen, badmintonda birde-bir licenziya qolǵa kirgizilmegen. Oq jaydan oq atıw sport túri boyınsha tek ǵana 3 licenziya alınǵan.

Olimpiada oyınlarında jeńil atletika túrleri boyınsha 48 baǵdarlama bar. Biraq, jeńil atletika federaciyası sońǵı olimpiadada tek ǵana 5 licenziyanı qolǵa kirgizdi.

Yadro, disk, nayza ılaqtırıw, sekiriw sport túrleri boyınsha birde-bir licenziya alınbadı. Yamasa, 49 suw sportı baǵdarlamasınan tek ǵana tórtewi boyınsha licenziya qolǵa kirgizilgen.

Oq atıw sportın rawajlandırıw ushın qorǵanıw sisteması hám "Vatanparvar" shólkeminde barlıq sharayat jaratılǵan. Biraq, birde-bir sportshımız Olimpiadaǵa barmadı.

Elimizde jeke gúres sport túrleri, milliy gúres rawajlanǵan bolsa da, grek-rim gúresi boyınsha tek ǵana 3 licenziya alınǵan.

Ótken jılı baydarka hám kanoeda eskek esiw boyınsha jáhán chempionatı birinshi márte elimizde ótkerildi. Biraq, onda elimiz birde-bir medal qolǵa kirgizbedi.