Qaraqalpaqstan Respublikası Ministrler Keńesi

Prezident Shavkat Mirziyoev 23-dekabr kúni Qaraqalpaqstan Respublikasında qosımsha imkaniyatlardı iske qosıw, investiciyanı kóbeytiw hám xalıqtıń bántligin arttırıw boyınsha 2025-jıldaǵı tiykarǵı wazıypalar boyınsha májilis ótkerdi. Usı jıl Qaraqalpaqstan ushın bereketli keldi, dep aytıw múmkin. Jańa sanaat kárxanaları, turizm dárgayları, energetika quwatlıqları, IT-park iske túsirildi. Qaraqalpaqstandı Xorezm menen baylanıstıratuǵın 423 metrlik jańa avtomobil hám temir jol kópiri ashıldı. Bul arqalı júk hám jolawshı tasıw aralıǵı 180 kilometrge qısqardı. 323 million dollar esabınan jańadan qurılǵan “Qońırat-Beynew” avtomobil jolınıń 240 kilometr bólegi paydalanıwǵa tapsırıldı. Sonıń ózi tranzit hám basqa da xızmetlerdiń kólemi jılına 200 million dollarǵa artıwına tiykar jaratadı. Jaqında 196 kilometrlik “Miskin – Nókis” temir jolın elektrlestiriw jumısları da baslanadı. Aymaqta sanaat, isbilermenlik hám infrastruktura tarawlarında 50 den aslam jeńillikler berilgen. Atap aytqanda, investiciyalıq joybarlar ushın tikkeley jer ajıratıw huqıqı tek ǵana Qaraqalpaqstanda engizilgen.

Ózbekstan Prezidentiniń isbilermenler menen ashıqtan-ashıq sóylesiwi bıyıl Nókiste ótkerilip, aymaqtıń potencialı kórsetip berildi. Sırt elli investor hám qánigeler de bul jerde dáramat tabıw ushın úlken imkaniyatlar payda bolǵanın aytpaqta. Máselen, bar ekonomikalıq potencial kompleksli analizlenip, awıl xojalıǵı, turizm hám xızmetler tarawında 2,5 milliard dollarlıq imkaniyatlar anıqlanǵan. Házir 87 mıń gektar paxtadan ortasha 28 centner zúráát alınbaqta, 10 rayonda rentabellik tómen. Ekspertler bunday az zúráátli paxta maydanların qısqartıp, ornına mal azıqlıǵı hám gúnji egiwdi usınıs etpekte. Azıqlıq eginler esabınan 6,5 trillion sumlıq gósh hám sút jetistiriw, gúnjiden eksporttı 500 million dollarǵa kóbeytiw múmkin ekenligi esap-kitap etilgen. Bul arqalı kóp suw da únemlenedi. Sonday-aq, Moynaqtıń ózinde keminde 1 milliard dollarlıq turizm joybarları ushın potencial bar. Bir pútin komplekslerdi iske túsirip, 1 million turistke xızmet kórsetiw hám 5 mıń xalıqtı dáramatlı etiw múmkin. Etno hám ekoturizm boyınsha da imkaniyatlar tolıq iske qosılmay atır. Savickiy muzeyi, “Shılpıq” esteligi, Ayaz qala, Topıraq qala sıyaqlı 200 den aslam dıqqatqa ılayıq orınlar, 10 nan aslam xalıq oyınları bar. Bul da 3 million turistti tartıp, bir neshe kún aylanıw ushın baǵdarlama. Bunday imkaniyatlarǵa iye respublikanıń juwapkerleri, rayon hákimleriniń wazıypasına jeke juwapkershiligin arttırıw zárúr ekenligi kórsetip ótildi. Isbilermenlerge aymaqtıń potencialın kórsetip, joybar usınıs etiw, bizneske járdemlesiw kerek. Sonda, jańadan-jańa jumıs orınları, qosımsha qun hám eksport boladı, adamlardıń dáramatı kóbeyedi. Májiliste Qaraqalpaqstan Respublikası Joqarǵı Keńesiniń Baslıǵı usınday imkaniyatlardı iske qosıw, investiciya hám jumıs orınların kóbeytiw boyınsha rejelerin tanıstırdı. Mámleketimiz basshısı olardıń quramına itibar qarattı. Atap aytqanda, kelesi jıl ushın rejelestirilgen 3,1 milliard dollar investiciyanıń tek ǵana 500 million dolları aymaqlıq joybarlarǵa tuwra keledi. Sonıń ushın rayonlardaǵı barlıq imkaniyatlardı jumsap, bul qatnastı kóbeytiw kerek ekenligi atap ótildi. Onıń ushın qosımsha 1 milliard dollarlıq aymaqlıq joybarlar qáliplestirilip, 120 kárxana iske qosıladı. Eksport muǵdarı 500 million dollarǵa jetkeriledi. 85 iri kárxana tolıq quwatlılıqqa alıp shıǵıladı. Sonday-aq, jańa kárxanalar, sawda hám servis maydanları shólkemlestirilip, 150 mıń adamnıń bántligi támiyinlenedi. Nátiyjede jumıssızlıq dárejesi 5,4 procentke túsedi. 20 mıń járdemge mútáj shańaraqqa dáramat dáregi jaratılıp, kámbaǵallıqtı 7,6 procentke azaytıw ilajları kóriledi. Búgingi kúnde Qaraqalpaqstanda 1 gigavattlı samal elektr stanciyası qurılmaqta. Jámi 9,3 gigavattlı bunday stanciyalar qurıw boyınsha joybarlar baslanbaqta. Bul – jılına 33 milliard kilovatt saat elektr energiyası, degeni. Tábiyǵıy gaz boyınsha da qolaylıq kóp. Sonıń ushın metallurgiya, ximiya, qurılıs materialları sıyaqlı tarmaqlardaǵı kóp energiya talap etetuǵın iri joybarlardı Qaraqalpaqstanda jaylastırıw zárúr ekenligi kórsetip ótildi. Awıl xojalıǵında da nátiyjelilikti arttırıw zárúr. Suwǵarılatuǵın jerlerde jámi 3 mıń gektar sanaatlasqan baǵ hám júzimzar jaratıladı. 31 mıń gektarda gúnji, 22 mıń gektarda másh egilip, eksportqa baǵdarlanadı. 30 mıń gektarda boyan tamır egiw boyınsha úsh jıllıq baǵdarlama islep shıǵıladı. Bular Qaraqalpaqstandaǵı imkaniyatlardıń ayırımları ǵana. Olardı nátiyjeli iske qosıw aymaqtıń jedel rawajlanıwın támiyinleydi. Sonıń ushın Qaraqalpaqstanda 3 tiykarǵı baǵdardı – awıl xojalıǵı, sanaat hám turizmdi rawajlandırıw boyınsha joybar ofisi shólkemlestiriledi. Bul struktura hár bir rayonnıń ósiw noqatların tallap, qanday eginlerdi jetistiriw, jerden dáramattı kóbeytiwge járdem beredi. Shiyki zat hám awıl xojalıǵı ónimlerin qayta islew boyınsha joybarlar tayarlap, hákimlerge jetkeredi. Jańa turizm baǵdarların ashıw hám olarǵa infrastruktura alıp barıw boyınsha usınıslar islep shıǵadı. Juwapkerlerge investiciyalıq joybarlardıń barısı, bántlik hám eksport rejeleriniń támiyinleniwin ayrıqsha qadaǵalaw boyınsha kórsetpeler berildi. Abıraylı sırt el ekspertlerin tartıp, hár bir rayondı rawajlandırıw strategiyasın islep shıǵıw tapsırıldı. Prezident Shavkat Mirziyoev Qaraqalpaqstan Respublikasında qosımsha imkaniyatlardı iske qosıw, investiciyanı kóbeytiw hám xalıqtıń bántligin arttırıw boyınsha 2025-jıldaǵı tiykarǵı wazıypalar boyınsha májilis ótkerdi.