Qaraqalpaqstan Respublikası Ministrler Keńesi

Keyingi jılları mámleketimizde húrmetli Prezidentimizdiń basshılıǵında barlıq tarawlardı sanlastırıwǵa hám bul jumıslarǵa jaslardı keńnen tartıwǵa ayrıqsha itibar qaratılmaqta. Bul baǵdarda burın bolmaǵan imkaniyatlar jaratılıp, óz gezeginde bul ámeliy ilajlar IT tarawın rawajlandırıwǵa bekkem tiykar bolıp xızmet etpekte. Búgin Qaraqalpaqstan Respublikası Ministrler Keńesiniń Baslıǵı F.Ermanov Vetnam mámleketiniń “FPT Corporation” kompaniyasınıń prezidenti Tran Dang Xoa basshılıǵındaǵı delegaciya aǵzaların qabılladı. Ushırasıw dawamında AKT tarawında birgeliktegi joybarlardı ámelge asırıw, investiciya kirgiziw, aldıńǵı bilimler almasıwın jolǵa qoyıw, qánigeler tayarlawǵa baylanıslı máseleler boyınsha sóylesiwler alıp barıldı. Óz-ara birge islesiwdi bekkemlew, jańa qospa joybarlardı ámelge asırıw hám málimleme-kommunikaciya tarmaqları infrastrukturasın bunnan bılay da jetilistiriw boyınsha anıq rejeler islep shıǵıwǵa kelisip alındı. Sonday-aq, sanlı ekonomikanı rawajlandırıw, kiberqáwipsizlikti támiyinlew hám málimleme almasıwın jaqsılaw máselelerine ayrıqsha itibar qaratıldı. Maǵlıwmat ushın: “FPT Corporation” kompaniyası Vetnamnıń jetekshi IT kompaniyası esaplanıp, 1998-jılı shólkemlestirilgen. 70 mıń qánige hám xızmetker isleytuǵın bul kompaniya búgin dúnyanıń 19 mámleketinde, sonıń ishinde, AQSh, Yaponiya, Germaniya, Franciya, Slovakiya, Singapur, Malayziya hám Avstraliyada óz bólimlerin ashqan. IBM, Microsoft, Oracle, Data Card, Siemens, Airbus, Amazon sıyaqlı iri kompaniyalar menen birge islesedi. Jıllıq sawda aylanısı $5 mlrd. di quraydı.