Qaraqalpaqstan Respublikası Ministrler Keńesi

Prezident Shavkat Mirziyoyev 25-noyabr kúni azıq-awqat qáwipsizligin támiyinlew, paxta hám ǵálle ónimdarlıǵın arttırıw boyınsha usınıslardıń prezentaciyası menen tanıstı.

Mámleketimiz basshısı jaqında bolıp ótken parlament májilisindegi shıǵıp sóylegen sózinde xalıqtıń sanı kóbeyip baratırǵan házirgi sharayatta azıq-awqat qáwipsizligin támiyinlew eń áhmiyetli wazıypa ekenin atap ótti.

Haqıyqatında da, elimiz xalqı jılına derlik 1 million adamǵa ósip barmaqta. Jer hám suw derekleri bolsa sheklengen. Sonıń ushın ishki bazar turaqlılıǵın isbilermenlik hám ónimdarlıq arqalı támiyinlew múmkin.

Prezentaciyada awıl xojalıǵı ministri bul baǵdardaǵı rejelerdi bildirdi.

Kelesi jılı 4 million 800 mıń gektar jerde eginler jetistiriw mólsherlengen. Sonnan 2 million gektardan aslam jerde miywe-ovosh, kartoshka, sobıqlı hám palız ónimleri egiledi. Olardıń atızlarda jaylastırılıwı hám zúrááttiń rezervke toplanıwı monitoring etip barıladı.

Atap aytqanda, xalıqqa birlemshi zárúr bolǵan 10 túrdegi tiykarǵı azıq-awqat ónimleriniń sistemalı esap-sanaǵı júrgiziledi. Onda hár bir rayon kesiminde qanday ónim jetistiriletuǵını hám ishki bazar ushın qanshası rezervke toplanıwı málim boladı.

Bizge belgili, Prezidentimizdiń baslaması menen 260 mıń gektar jer 800 mıń xalıqqa diyqanshılıq etiw ushın bólinip berilgen edi. Sonday-aq, Sayxunabad tájiriybesi tiykarında qıytaq jerlerde ónim jetistiriw qollap-quwatlanbaqta. Bul adamlardı, ásirese, jaslardı jumıs ornı hám dáramat penen támiyinlewde durıs jol bolǵanın turmıstıń ózi kórsetti. Sonday-aq, bul awıl xojalıǵı ónimleriniń kóp jetistirilip, olardıń bahası keskin artıp ketpewiniń áhmiyetli faktorı boldı.

Endi bul jumıslardıń sapasın arttırıp, ajıratılǵan jerler hám qıytaq jerlerden ónimli paydalanıw, xalıqqa ilimiy hám ámeliy jaqtan járdemlesiw zárúr. Bunnan tısqarı, rayonlardıń ózi awıl xojalıǵına grant hám texnikalıq járdemlerdi tartıwı, aldınǵı texnologiyalardı qollanıwı talap etiledi.

Mámleketimiz basshısı sırt el tájiriybesin úyrenip, kartoshka jetistiriw sistemasın jetilistiriw hám ónimdarlıǵın arttırıw zárúrligin atap ótti.

Ótken jıldıń qısında 9 mıń gektar baǵ hám 4 mıń gektar júzim atızların suwıq urǵan edi. Nátiyjede 207 mıń tonna ónim nabıt boldı.

Prezidentimiz bunday hawa-rayı sharayatlarında diyqanlardıń zıyan kóriwiniń aldın alıw boyınsha tapsırma bergen edi. Soǵan muwapıq, sırt elli qánigeler menen birgelikte "Awıl xojalıǵı táwekelshiligin qamsızlandırıw haqqında"ǵı nızam joybarı islep shıǵıldı. Onıń qabıl etiliwi diyqan hám fermerlerdiń ekonomikalıq qorǵalıwın támiyinleydi.

Paxtashılıqta sırt el sortların egiwdiń nátiyjeliligi tallandı.

Mámleketimiz basshısı bul baǵdarda klaster, fermer hám sanaat kárxanalarınıń pikirin úyrenip, máselege ilimiy qatnas jasaw, fermerlerdi zamanagóy agrotexnologiyalarǵa oqıtıw áhmiyetli ekenin atap ótti. Zamanagóy paxta teriw mashinası hám xalıqtıń qıytaq jerleri ushın kishi agrotexnikalar islep shıǵarıw boyınsha tapsırmalar berildi.

"Jasıl mákan" ulıwma milliy joybarı sheńberinde barlıq aymaqlarda terekzarlar boy tiklemekte. Bunday baǵlardıń átirapı hám atız shetlerinde adamlarǵa payda keltiretuǵın eginler jetistiriw múmkin ekenligi aytıldı.

Prezentaciyada wálayat hám rayonlarda awıl xojalıǵı tarawında basqarıw sistemasın reformalawǵa baylanıslı usınıslar da kórip shıǵıldı.