Túrkiyanıń Antalya qalasında ótip atırǵan BMShnıń Klimat ózgeriwi boyınsha «COP31» konferenciyasında Qaraqalpaqstan delegaciyası qatnaspaqta
2026-11-10 11:25:00 / Ministrlik

Usı global sammitte Qaraqalpaqstan Respublikası Ministrler Keńesi janındaǵı Sırtqı biyǵárez kómek qarjıların (grantlardı) tartıw hám donorlar menen islesiw orayı direktorı K.Idirisov, Qaraqalpaqstan Respublikası Ekologiya hám klimat ózgeriwi milliy komiteti baslıǵı L.Seitova hám de Qaraqalpaqstan Respublikası Joqarǵı Keńesiniń bas yuridikalıq másláhátshisi Sh.Sapartaevtan ibarat rásmiy delegaciya qatnaspaqta.
COP31 konferenciyasınıń tiykarǵı maqseti klimat tarawındaǵı birge islesiwdi rawajlandırıw, óz-ara awızbirshilikti bekkemlew hám ámeliy háreketlerdi tezlestiriwden ibarat. Ilaj sheńberinde delegaciya aǵzaları klimattı qarjılandırıw, ázzi aymaqlardıń klimat qáwip-qáterlerine beyimlesiwi hám shıdamlılıǵın arttırıw sıyaqlı tiykarǵı baǵdarlardaǵı dodalawlarda qatnaspaqta. Sonday-aq, kún tártibinen klimatqa baylanıslı sheshimlerdi tezlestiriw hám investiciyalardı tartıw maqsetinde mámleketlik-jeke menshik sheriklik mexanizmlerin rawajlandırıw máseleleri de orın alǵan.


