Jámiyetlik tıńlaw: nátiyjeler, tallaw hám usınıslar
2026-10-30 17:15:00 / Ministrlik
Usı wazıypalardıń orınlanıwın támiyinlew maqsetinde orınlarda jámiyetlik tıńlawlar ótkerilmekte.
Atap aytqanda, “Yuksalish” ulıwma milliy háreketi Qaraqalpaqstan Respublikası aymaqlıq bólimi tárepinen “Ózbekstan – 2030” strategiyasın “Máhálleni rawajlandırıw hám jámiyetti ilgeriletiw jılı”nda ámelge asırıwǵa baylanıslı Mámleketlik baǵdarlamadaǵı onkologiyalıq keselliklerdiń aldın alıw, olardı erte anıqlaw hám xalıqqa kórsetilip atırǵan medicinalıq xızmetlerdiń sapasın arttırıw baǵdarındaǵı wazıypalardıń yanvar-sentyabr aylarındaǵı orınlanıwı boyınsha gezektegi jámiyetlik tıńlaw shólkemlestirildi.
Ilajdı “Yuksalish” háreketi Qaraqalpaqstan Respublikası aymaqlıq bóliminiń baslıǵı T.Romanov alıp bardı.
Onda Qaraqalpaqstan Respublikası Densawlıqtı saqlaw ministrliginiń qánigeleri, Respublikalıq qánigelestirilgen onkologiya hám radiologiya ilimiy-ámeliy medicina orayı Qaraqalpaqstan filialınıń shıpakerleri, puqaralıq jámiyeti institutları hám ǵalaba xabar qurallarınıń wákilleri, tiyisli uyım hám shólkemlerdiń juwapkerleri qatnastı.
Jámiyetlik tıńlawda Mámleketlik baǵdarlamanıń orınlanıwı sheńberinde ámelge asırılǵan jumıslar, erisilgen nátiyjeler hám processte ushırasıp atırǵan mashqalalar hár tárepleme talqılandı.
Respublikalıq qánigelestirilgen onkologiya hám radiologiya ilimiy-ámeliy medicina orayı Qaraqalpaqstan filialında 2026-jıl dawamında xalıq arasında onkologiyalıq keselliklerdiń aldın alıw, atap aytqanda, hayal-qızlar arasında sút bezi hám jatır moynı ragi hám basqa da onkologiyalıq keselliklerge qarsı obektiv, citologiyalıq tekseriwler, kolposkopiya hám mammografiyalıq tekseriwler shólkemlestirilgen.
Atap aytqanda, 2026-jıldıń 9 ayı dawamında 53 mıń 876 hayal (47,4%) sút bezi ragi skrininginen ótkerilgen. Nátiyjede, 76 sında sút bezi ragi keselligi anıqlanǵan bolıp, sonnan 46 procenti, yaǵnıy, 35 hayaldıń keselligi erte basqıshta (I-II basqısh) hám derlik 54 procenti, yaǵnıy, 41 hayaldıń keselligi kesh basqıshta (III-IV basqısh) ekenligi málim bolǵan.
– Búgingi kúnde skrining tekseriwine qamtıp alıw dárejesi tómenliginiń tiykarǵı sebeplerinen biri rayonlıq medicina birlespelerinde onkolog qánigelerdiń jetispewshiligi bolıp esaplanadı. Atap aytqanda, Shomanay, Moynaq, Qaraózek, Bozataw hám Ellikqala rayonları onkolog shıpakerler menen támiyinlenbegen. Sonlıqtan, rayonlarǵa maman qánigelerdi tartıw hám baslanǵısh medicinalıq xızmetti kórsetiw jumısın bunnan bılay da jetilistiriw zárúr, – deydi Qaraqalpaqstan Respublikası Densawlıqtı saqlaw ministriniń orınbasarı Gáwhar Abdisametova. – Medicina mákemelerin medicinalıq úskeneler menen támiyinlew baǵdarında da bir qatar mashqalalar bar. Sonıń ishinde, Qońırat rayonında imarattıń kapital ońlanıp atırǵanlıǵı sebepli mammografiya apparatı waqtınsha islemey tur. Shımbay rayonında bolsa, mammografiya apparatınıń gónergenligi sebepli onnan tek diagnoz qoyıw maqsetinde paydalanılmaqta. Jámiyetlik tıńlawdıń juwmaqları boyınsha Strategiyanıń, Mámleketlik baǵdarlamanıń orınlanıwın támiyinlew hám jámiyetlik tıńlawda kóterilgen máselelerdi sheshiwge qaratılǵan usınıslar islep shıǵıldı.