Ózbekstan Respublikası Prezidenti ǴMDA sammitinde qatnastı
2024-10-09 09:30:00 / Ministrlik
08.10.2024
Ózbekstan Respublikası Prezidenti Shavkat Mirziyoev 8-oktyabr kúni Ǵárezsiz Mámleketlerdiń Doslıq Awqamı Mámleket basshıları keńesiniń gezektegi májilisinde qatnastı.
Rossiya Federaciyası Prezidenti Vladimir Putin basshılıǵında ótken sammitte Ázerbayjan Respublikası Prezidenti Ilham Aliev, Belarus Respublikası Prezidenti Aleksandr Lukashenko, Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon, Túrkmenstan Prezidenti Serdar Berdimuhamedov hám Armeniya Bas ministri Nikol Pashinyan, sonday-aq, ǴMDA bas xatkeri Sergey Lebedev qatnastı.
Kún tártibine muwapıq, kóp qırlı qatnasıqlardıń jaǵdayı hám rawajlanıw perspektivaları boyınsha pikir alısıldı, ǴMDA sheńberindegi ámeliy birge islesiwdiń áhmiyetli máseleleri dodalandı.
Mámleketimiz basshısı óziniń shıǵıp sóylegen sózinde Rossiyanıń Doslıq Awqamına basshılıǵı dáwirinde kóp tárepleme birge islesiw barlıq baǵdarlarda rawajlanǵanın joqarı bahaladı.
ǴMDA mámleketleriniń qáwipsizligi hám turaqlı rawajlanıwın támiyinlew menen baylanıslı jaǵdayǵa ayrıqsha itibar qaratıldı.
ǴMDA mámleketleri arnawlı xızmetleri hám wákillikli uyımlarınıń sistemalı birge islesiwin jolǵa qoyıw, búgingi qáwip-qáterlerge qarsı gúresiw usılların jetilistiriw, kiberqáwipsizlikti támiyinlew tarawında kelisilgen ilajlar hám baǵdarlamalıq hújjetlerdi qabıl etiw áhmiyetli ekenligi atap ótildi.
Birge islesiwdiń ekonomikalıq baǵdarındaǵı birgeliktegi jumıstı kúsheytiw tiykarǵı wazıypa ekeni atap ótildi.
Ózbekstannıń ǴMDA mámleketleri menen tovar almasıw kólemi jıl basınan berli 16 procentke arttı. Tabıslı sanaat kooperaciyasına mısallar kóp.
ǴMDA tarmaq keńesleri hám komitetleriniń jumısın jedellestiriw zárúr ekenligi kórsetip ótildi.
Kelesi jılı báhárde Tashkent qalasında "Innoprom" xalıqaralıq sanaat kórgizbesi sheńberinde ǴMDA Ekonomikalıq keńesiniń májilisi hám Innovaciyalıq rawajlanıw forumın ótkeriw usınıs etildi.
Jaqında bolıp ótken ǴMDA mámleketleri jetekshi tallaw oraylarınıń Tashkent konferenciyası nátiyjelerin esapqa alǵan halda, uzaq múddetli sherikliktiń jańa tiykarǵı baǵdarların qollap-quwatlaw áhmiyetli ekeni atap ótildi.
Atap aytqanda, internet texnologiyaları hám "úlken maǵlıwmatlar" industriyasın rawajlandırıw, sanlı sheshimlerdi jedel engiziw, kreativ ekonomika, jasıl energetika hám yadro texnologiyaları, klimat mashqalaları hám basqalar solardıń qatarına kiredi.
Usı múnásibet penen ǴMDA mámleketleri ekspertleri hám analitikleriniń ushırasıwların turaqlı ótkeriw jáne gezektegi konferenciyanı Samarqand qalasında jasalma intellektti rawajlandırıw máselelerine baǵıshlap ótkeriw usınıs etildi.
Gumanitarlıq almasıwlardı keńeytiw maqsetinde Doslıq Awqamı mámleketleriniń mádeniyat kúnlerin ótkeriw usınıs etildi. Sonıń menen birge, densawlıqtı saqlaw, bilimlendiriw, kórkem óner, kino, turizm hám sport tarawlarında qospa ilajlar baǵdarlamasın hár jılı tayarlaw zárúr ekenligi atap ótildi.
Samarqand hám Tashkentti tiyislisinshe Doslıq Awqamınıń mádeniy paytaxtı hám jaslar paytaxtı dep járiyalanıwı sheńberindegi joybarlar ámelge asırılıp atırǵanı qanaatlanıwshılıq penen atap ótildi.
Bunnan tısqarı, Ózbekstanda shaxmat hám futbol boyınsha jaslar komandaları arasında ǴMDA ashıq kubogi jarısları ótkeriledi.
Juwmaǵında Ózbekstan Prezidenti Tájikstan Respublikası Prezidenti Emomali Rahmondı 2025-jılı shólkemge basshılıqtı qabıl etkeni menen qutlıqladı.
Sammit juwmaǵında ǴMDA sheńberindegi birge islesiwdiń tiykarǵı baǵdarları boyınsha bir qatar kelisim hám qararlar qabıl etildi.