Xalıq penen ashıq sáwbet dawam etpekte
2026-10-09 20:45:00 / Ministrlik
Xalıqtıń múrájatların tıńlaw, olardıń mashqalalarına sheshim tabıw hám puqaralardıń nızamlı máplerin támiyinlew mámleketimiz basqarıwında áhmiyetli orın iyeleydi. Sebebi, hár bir múrájattıń artında insan táǵdiri, kúndelikli turmısqa baylanıslı másele hám sheshimin kútip atırǵan mashqala jámlengen.
Usı maqsette búgin Qaraqalpaqstan Respublikası Ministrler Keńesiniń Baslıǵı F.Ermanovtıń qatnasıwında Kegeyli rayonında puqaralar qabıllawı bolıp ótti. Onda puqaralardıń múrájatları tıńlanıp, olardı sheshiw boyınsha tiyisli ilajlar belgilendi.
Qabıllaw dawamında jámi 11 múrájat kórip shıǵıldı. Olardıń 6 wı ornında unamlı sheshildi. Bul bolsa puqaralardı qıynap atırǵan máselelerdi múmkin bolǵanınsha jedel úyreniw hám ámeliy sheshim tabıwǵa ayrıqsha itibar qaratılıp atırǵanın kórsetedi.
Qalǵan múrájatlar da itibardan shette qalmadı. Olardı belgilengen tártipte tereń úyreniw, zárúr ilajlardı kóriw hám nızamlı sheshim tabıw maqsetinde juwapker shólkemler tárepinen tiyisli jumıslardı ámelge asırıw belgilendi.
Haqıyqatında da, xalıq penen ashıqtan-ashıq sóylesiwdiń áhmiyeti tek ǵana múrájatlardı tıńlaw emes, al hár bir máselege juwapkershilik penen qatnas jasaw, onıń sheshimin izlew hám puqaralardıń isenimin aqlawda kórinedi.
Xalıqtıń múrájatlarına itibar — insan máplerine itibar. Sol sebepli puqaralardı qıynap atırǵan mashqalalardı óz waqtında anıqlaw, olardı nızamlı hám nátiyjeli sheshiw jáne múrájatlardıń orınlanıwın qadaǵalaw baǵdarındaǵı jumıslar izbe-iz dawam ettiriledi.