Qaraqalpaqstannıń uzaq múddetli rawajlanıw perspektivaları dodalandı
2026-09-11 10:30:00 / Ministrlik
Ushırasıwda Qaraqalpaqstannıń hár bir rayon hám qalasınıń ózine tán imkaniyatların hám bar mashqalaların tereń tallaǵan halda sanaat, awıl xojalıǵı, xızmet kórsetiw hám turizm tarawlarında rawajlanıwdıń tiykarǵı baǵdarların belgilew áhmiyetli ekenligi atap ótildi.
Sonday-aq, Oraylıq Aziya regionallıq ekonomikalıq birge islesiw baǵdarlamasınıń 2-transport koridorı hám A-380 avtomobil jolınıń imkaniyatlarınan nátiyjeli paydalanıw, transport-logistika xızmetleri, óndiris hám sawda baǵdarların rawajlandırıw boyınsha ámeliy usınıslar islep shıǵıw boyınsha pikir alısıldı.
Sóylesiwlerde investiciyalıq joybarlardıń ústinligi tiykarında tańlap alıw, olar ushın zárúr infrastrukturanı qáliplestiriw, qarjılandırıw dáreklerin anıqlaw menen bir qatarda ekologiyalıq turaqlılıq hám suw resurslarınan aqılǵa uǵras paydalanıw máselelerine de ayrıqsha itibar qaratıldı.
Sóylesiw juwmaǵında strategiyanı ámeliyatqa nátiyjeli engiziw, onda belgilengen wazıypalardı anıq múddet hám nátiyje kórsetkishleri tiykarında ámelge asırıwdı názerde tutatuǵın "jol kartası"n islep shıǵıw boyınsha kelisip alındı.
Ushırasıwda birge islesiwdi izbe-iz dawam ettiriw hám Qaraqalpaqstannıń bar ekonomikalıq potencialın jańa joybarlar jáne jumıs orınlarına aylandırıwǵa qaratılǵan ámeliy ilajlardı kúsheytiw áhmiyetli ekenligi atap ótildi.