Awıl xojalıǵında jańa birge islesiw baǵdarları dodalandı
2026-09-10 13:05:00 / Ministrlik
Ushırasıwda aymaqtıń awıl xojalıǵı potencialınan nátiyjeli paydalanıw, zamanagóy agrotexnologiyalardı keńnen engiziw hám agrar tarawda xalıqaralıq tájiriybeni engiziw máseleleri boyınsha sóylesiwler alıp barıldı.
Atap aytqanda, sharwashılıq hám qusshılıq komplekslerin rawajlandırıw, bekkem hám turaqlı azıqlıq bazasın jaratıw, zamanagóy tárbiyalaw, azıqlandırıw hám qayta islew texnologiyaların engiziw perspektivaları dodalandı.
Sonday-aq, selekciya hám genetika baǵdarlarında aldınǵı sheshimlerden paydalanıw, aymaqlarda awıl xojalıǵı ónimlerin jetistiriw nátiyjeliligin arttırıw, olardı tereń qayta islew hám eksport potencialın keńeytiwge xızmet etetuǵın agrosanaat klasterlerin shólkemlestiriw boyınsha usınıslar kórip shıǵıldı.
Tárepler bul baǵdarlarda qospa joybarlardı ámelge asırıw, bar imkaniyatlardı úyreniw hám perspektivalı birge islesiw joybarların qáliplestiriw áhmiyetli ekenligin atap ótti.
Maǵlıwmat ushın, BF Group (Bonifiche Ferraresi S.p.A.) Italiyanıń iri agrar kompaniyalarınan biri bolıp, 7,7 mıń gektar konsolidaciyalasqan jer maydanına iye.
Kompaniya awıl xojalıǵı ónimlerin jetistiriwden baslap, olardı qayta islew hám tayar ónim túrinde bazarǵa shıǵarıwǵa shekemgi tolıq vertikal qun shınjırın qáliplestirgen.
Kompaniyanıń strategiyalıq ústinliklerden biri - "genomnan sawda ornına shekem" principi tiykarında jumıs alıp barıwı bolıp, onda tuqımgershilik, jetistiriw, sharwashılıq hám qusshılıq, azıq-awqat bazası, qayta islew hám tayar ónimdi bazarǵa shıǵarıwdıń óz-ara baylanıslı sisteması qadaǵalanadı. Sonıń ishinde, BF Group quramındaǵı S.I.S. (Società Italiana Sementi) arqalı qattı sortlı biyday hám salı sıyaqlı strategiyalıq eginlerdiń tuqımlıq bazası menen baylanıslı baǵdarlarda jumıs alıp baradı.
Bul tájiriybe hám potencialdı Qaraqalpaqstannıń agrar imkaniyatları menen úylestiriw aymaqta awıl xojalıǵı óndirisiniń nátiyjeliligin, qayta islew dárejesin hám eksport imkaniyatların arttırıwǵa xızmet etedi.