Qaraqalpaqstan Respublikası Ministrler Keńesi

Qaraqalpaqstan awıl xojalıǵı hám agrotexnologiyalar institutında bolıp ótken ilajda Qaraqalpaqstan Respublikası Ministrler Keńesiniń Baslıǵı Farxod Ermanov, "Tashkent irrigaciya hám awıl xojalıǵın mexanizaciyalaw injenerleri institutı" Milliy izertlew universitetiniń rektorı, texnika ilimleriniń doktorı Bahodir Mirzayev, taraw qánigeleri, ilimpazlar hám awıl xojalıǵı sisteması wákilleri qatnastı.

Ilajdıń tiykarǵı maqseti — Qaraqalpaqstan sharayatında suw resurslarınan nátiyjeli hám únemli paydalanıw, awıl xojalıǵına zamanagóy texnologiyalardı keńnen engiziw, sonday-aq, ilim jetiskenliklerin ámeliyat penen úylestiriwden ibarat.

Seminar dawamında innovaciyalıq texnologiyalar boyınsha prezentaciyalar ótkerilip, olardıń awıl xojalıǵında nátiyjelilikti arttırıw, suw hám energiya resursların únemlew jáne eginlerdi jetistiriw processlerin zamanagóylestiriwdegi imkaniyatları haqqında maǵlıwmatlar berildi.

Sonday-aq, ilaj sheńberinde zamanagóy sheshimlerdiń ámeliy imkaniyatları kórsetildi. Sonıń ishinde, plazma texnologiyaları, mobil laboratoriya hám úskeneler, energoaudit, dronlar boyınsha kórgizbeler shólkemlestirilip, olardıń tarawda qollanılıwı boyınsha túsinikler berildi. Bunnan tısqarı, salını intensiv usılda jetistiriw texnologiyası da ámeliy tárizde kórsetildi.

Prezentaciyalar juwmaǵında qatnasıwshılar menen soraw-juwaplar ótkerilip, Qaraqalpaqstan sharayatında suwdı únemlew, zamanagóy agrotexnologiyalardı engiziw hám awıl xojalıǵı nátiyjeliligin arttırıwǵa baylanıslı máseleler boyınsha pikir alısıldı.

Ilajdıń áhmiyetli táreplerinen jáne biri - "Tashkent irrigaciya hám awıl xojalıǵın mexanizaciyalaw injenerleri institutı" Milliy izertlew universiteti menen Qaraqalpaqstan Respublikası arasında birge islesiw haqqındaǵı Memorandumǵa qol qoyılǵanı bolıp tabıladı. Bul hújjet ilim, bilimlendiriw, innovaciyalıq texnologiyalar hám awıl xojalıǵı ámeliyatın jáne de jaqınlastırıw, aldınǵı qollanbalardı aymaqta keńnen engiziw baǵdarındaǵı birge islesiwdi jańa basqıshqa alıp shıǵıwǵa xızmet etedi.

Ulıwma, búgingi oqıw-ámeliy seminar hám kórgizbe Qaraqalpaqstanda suw resurslarınan aqılǵa uǵras paydalanıw, awıl xojalıǵına zamanagóy texnologiyalardı engiziw hám ilimiy jetiskenliklerdi óndiris processlerine keńnen engiziw jolındaǵı áhmiyetli ámeliy qádem boldı.

Qaraqalpaqstanda suwdı únemlew hám awıl xojalıǵında innovaciyalıq qatnaslar boyınsha ámeliy seminar ótkerildi