Hár bir múrájat itibar hám juwapkershilik penen kórip shıǵıldı.
2026-08-06 11:25:00 / Ministrlik
Qabıllaw dawamında 20 ǵa shamalas puqaranıń múrájatı tıńlanıp, olardı qıynap kiyatırǵan áhmiyetli máseleler hár tárepleme kórip shıǵıldı. Atap aytqanda, múrájatlardıń tiykarǵı bólegin sociallıq qorǵaw, bilimlendiriw, medicina hám sociallıq járdem kórsetiw menen baylanıslı máseleler quradı.
Hár bir múrájat boyınsha puqaralarǵa ámeldegi nızamshılıq talapları tiykarında zárúr huqıqıy túsinikler berildi. Orınlarda sheshiliwi múmkin bolǵan máseleler boyınsha juwapker basshı hám juwapkerlerge anıq tapsırmalar júklendi, qosımsha úyreniwdi talap etetuǵın múrájatlar bolsa qadaǵalawǵa alınıp, olardıń orınlanıwın támiyinlew boyınsha tiyisli uyımlarǵa wazıypalar belgilendi.
Jeke qabıllaw dawamında puqaralardı oylandırıp atırǵan mashqalalardı óz waqtında saplastırıw, olardıń nızamlı máplerin támiyinlew jáne xalıq penen ashıq hám nátiyjeli pikirlesiwdi bunnan bılay da bekkemlew máselelerine ayrıqsha itibar qaratıldı.
Bunday qabıllawlar xalıqtıń múrájatların óz waqtında kórip shıǵıw, bar mashqalalarǵa ámeliy sheshim tabıw hám puqaralardıń mámleketlik uyımlarǵa bolǵan isenimin jáne de bekkemlewde úlken áhmiyetke iye bolmaqta.