Pakistan Islam Respublikası delegaciyası menen awıl xojalıǵı tarawındaǵı investiciya perspektivaları dodalandı
2026-08-03 11:25:00 / Ministrlik
Bul delegaciya awıl xojalıǵı tarawında kóp jıllıq tájiriybege iye fermerlerden ibarat bolıp, sapardıń tiykarǵı maqseti Qaraqalpaqstan Respublikasında kartoshka jetistiriw baǵdarındaǵı investiciyalıq imkaniyatlardı úyreniwden ibarat.
Ushırasıw dawamında aymaqtaǵı kartoshka jetistiriw ushın bar jer maydanları, zamanagóy agrotexnologiyalardı engiziw, tuqımgershilik sisteması, mineral tóginler menen támiyinlew, suwǵarıw imkaniyatları hám bar infrastruktura máseleleri boyınsha tolıq pikir alısıldı.
Sonday-aq, tárepler awıl xojalıǵı tarawında óz-ara paydalı birge islesiwdi keńeytiw, aldınǵı tájiriybelerdi engiziw, zamanagóy texnologiyalar tiykarında kartoshka jetistiriwdi rawajlandırıw hám perspektivalı investiciyalıq joybarlardı ámelge asırıw perspektivaların dodaladı.
Ushırasıw juwmaǵında tárepler óz-ara birge islesiwdi bunnan bılay da bekkemlew, investiciyalıq baslamalardı qollap-quwatlaw hám keleshekte ámeliy joybarlardı birgelikte ámelge asırıw boyınsha birge islesiwdi dawam ettiriwge tayar ekenin bildirdi.