Qaraqalpaqstan Respublikası Ministrler Keńesi

Xızmet saparı dawamında delegaciya Pakistannıń iri sanaat, awıl xojalıǵı hám biznes wákilleri, sonday-aq, jergilikli mámleketlik uyımlardıń basshıları menen ushırasıwlar ótkerip, sawda-ekonomikalıq, investiciyalıq hám aymaqlararalıq birge islesiwdi jańa basqıshqa alıp shıǵıwǵa xızmet etetuǵın perspektivalı joybarlardı dodaladı.

Sonıń ishinde, Lahor qalasında Pakistannıń ximiya sanaatındaǵı jetekshi kárxanalarınan biri - "Nimir Industrial Chemicals Ltd" kompaniyasınıń basshıları menen sóylesiwler ótkerildi. Ushırasıwda Qaraqalpaqstannıń investiciyalıq potencialı, sırt el investorları ushın jaratılǵan qolaylı sharayatlar hám aymaqtaǵı perspektivalı joybarlar tanıstırıldı. Tárepler Qońırat rayonında duzdı tereń qayta islewge qánigelesken zamanagóy ximiya sanaatı kárxanasın qurıw boyınsha investiciyalıq shártnamaǵa qol qoydı. Sonday-aq, kompaniya wákilleri joybardı ornında úyreniw maqsetinde usı jılı iyul ayınıń aqırında Qaraqalpaqstanǵa barıwǵa kelisip aldı.

Sapar sheńberinde "Abdin International Pvt. Ltd." kompaniyasınıń bas direktorı Navaz Hassan menen de nátiyjeli sóylesiwler ótkerildi. Onda sharwashılıq tarawın rawajlandırıw, zamanagóy texnologiyalardı engiziw, násilli qaramallardı kóbeytiw hám ot-jem bazasın jaratıwǵa qaratılǵan birgeliktegi joybarlar dodalandı. Sóylesiwler juwmaǵında "Nukus Delisha" kompaniyası menen sheriklik tiykarında qospa kárxana shólkemlestiriw, Pakistannan 200 bas násilli iri qaramal alıp keliw hám usı baǵdarda investiciyalıq joybardı ámelge asırıw boyınsha shártnamaǵa qol qoyıldı.

Delegaciyanıń áhmiyetli ushırasıwlarınan biri Pakistannıń Panjob provinciyası Bas ministri Maryam Navoz Sharif penen bolıp ótti. Sóylesiw dawamında Ózbekstan hám Pakistan arasındaǵı strategiyalıq sheriklik qatnasıqların aymaqlararalıq birge islesiw arqalı jáne de bekkemlew máseleleri dodalandı.

Tárepler Qaraqalpaqstan hám Panjob provinciyası arasında sawda-ekonomikalıq, investiciyalıq hám sanaat kooperaciyasın keńeytiw, awıl xojalıǵı, sharwashılıq, toqımashılıq, farmacevtika, málimleme texnologiyaları, taw-kán sanaatı hám logistika tarawlarında birgeliktegi investiciyalıq joybarlardı ámelge asırıw boyınsha pikir alıstı.

Sonday-aq, Panjobdıń aldınǵı agrotexnologiyaların Qaraqalpaqstanda engiziw, pakistanlı fermerlerdi aymaqqa tartıw, arnawlı erkin ekonomikalıq zonanı shólkemlestiriw, zamanagóy xalıqaralıq logistika orayın qurıw, joqarı qosımsha qunǵa iye ónimler islep shıǵarıwǵa baǵdarlanǵan investorlardı tartıw boyınsha bir qatar baslamalar alǵa qoyıldı.

Mádeniy-gumanitarlıq birge islesiwdi rawajlandırıw maqsetinde Nókis hám Lahor qalaları arasında doslıq qatnasıqların jolǵa qoyıw usınısı da qollap-quwatlandı hám bul baǵdarda ámeliy jumıslardı baslaw boyınsha kelisimge erisildi.

Ulıwma alǵanda, xızmet saparınıń juwmaqları Qaraqalpaqstan Respublikasınıń investiciyalıq tartımlılıǵın xalıqaralıq maydanda jáne bir márte kórsetti. Erisilgen kelisim hám qol qoyılǵan investiciyalıq shártnamalar aymaqta jańa óndiris quwatlıqların jaratıw, jergilikli shiyki zattı tereń qayta islew, zamanagóy texnologiyalardı engiziw, jańa jumıs orınların jaratıw hám tikkeley sırt el investiciyalarınıń kólemin arttırıwǵa xızmet etetuǵını menen ayrıqsha áhmiyetke iye.