Pakistandaǵı xızmet saparı sheńberindegi ushırasıwlar dawam etpekte
2026-07-03 18:10:00 / Ministrlik
Sapardıń gezektegi basqıshında delegaciya aǵzaları Pakistan mámleketiniń Sialkot wálayatı, Sialkot qalasında sport úskeneleri hám medicina tarawı ushın ónimler islep shıǵarıwǵa qánigelesken Leatherware (Pvt.) Silver Star Group (Pvt.) Limited, Wembley Sports, Tecno Instruments (Pvt.) Limited hám Long Life Surgical Ltd kompaniyalarınıń jumısı menen jaqınnan tanıstı.
Ushırasıwlar dawamında bul kárxanalardıń óndiris processleri, eksport potencialı, ónimniń sapası hám xalıqaralıq bazardaǵı tájiriybesi hár tárepleme úyrenildi. Sonday-aq, óz-ara paydalı birge islesiwdi jolǵa qoyıw hám investiciyalıq joybarlardı ámelge asırıw boyınsha pikir alısıldı.
Sóylesiwler waqtında Ózbekstan aymaǵındaǵı barlıq mektepke shekemgi bilimlendiriw mákemeleri, ulıwma bilim beriw mektepleri, máhálleler, jaslar orayları, sport kompleksleri hám basqa da sociallıq taraw obektleriniń sport inventarlarına bolǵan talabın hár tárepleme tallaw, sonday-aq, qońsı mámleketler bazarındaǵı talaptı da esapqa alǵan halda Pakistannıń jetekshi brend kompaniyalarınıń qatnasıwında Qaraqalpaqstan Respublikasında zamanagóy sport inventarların islep shıǵarıw quwatlıqların shólkemlestiriw máseleleri dodalandı.
Sonday-aq, medicina tarawında jumıs alıp barıp atırǵan kompaniyalardıń basshılarına mámleketimizde investorlar ushın jaratılǵan qolaylı sharayatlar, ámelge asırılıp atırǵan reformalar hám bul baǵdardaǵı imkaniyatlar haqqında prezentaciya ótkerildi.
Ushırasıwlar juwmaǵında medicina sanaatın rawajlandırıw, zamanagóy medicinalıq buyımlar islep shıǵarıwdı jolǵa qoyıw hám Qaraqalpaqstan Respublikasında perspektivalı investiciyalıq joybarlardı ámelge asırıw boyınsha bir qatar kelisimlerge erisildi.
Bul ushırasıwlar xızmet saparı sheńberinde Qaraqalpaqstan Respublikasınıń sanaat potencialın bunnan bılay da arttırıw, eksportqa qolaylı ónimler islep shıǵarıwdı keńeytiw, jańa jumıs orınların jaratıw jáne sırt el investorları menen uzaq múddetli hám óz-ara paydalı birge islesiwdi bekkemlew jolındaǵı áhmietli qádem boldı.