Nókis qalasında ushırasıw: Hár bir múrájat artında insan táǵdiri turıptı
2026-06-29 09:25:00 / Ministrlik
Qaraqalpaqstan Respublikası Ministrler Keńesi Baslıǵınıń orınbasarı, Shańaraq hám hayal-qızlar komitetiniń baslıǵı M.Axmedovanıń qatnasıwında tastıyıqlanǵan reje-grafik tiykarında xalıq penen tikkeley hám ashıq-aydın pikirlesiwdi támiyinlew maqsetinde gezektegi puqaralar qabıllawı bolıp ótti. Bul sóylesiw tek ǵana rásmiy ushırasıw emes, al puqaralardıń dárti hám táshwishlerine ámeliy sheshim tabıw, olardı qıynap atırǵan turmıslıq máselelerdi sistemalı sheshiw jolındaǵı áhmiyetli qádem boldı.
Qızǵın hám issheń ruwxta ótken qabıllawda puqaralar ózleriniń áhmiyetli mashqalaları, jeke hám sociallıq baslamaları menen qatnastı. Múrájatlardıń tiykarǵı bólegi turaq jay hám kommunallıq taraw, bántlikti támiyinlew hám sociallıq járdemge mútáj shańaraqlardı qollap-quwatlaw sıyaqlı máselelerdi qamtıp aldı.
Itibarlı tárepi, sóylesiw dawamında júzeki qatnasıqlardan pútkilley waz keshildi. Hár bir múrájat respublika kólemindegi juwapker uyımlar hám taraw basshılarınıń qatnasıwında tereń tallandı. Orınlarda sheshiw múmkin bolǵan mashqalalar jedellik penen saplastırılǵan bolsa, waqıt hám úyreniw talap etiletuǵın hár bir múráját jeke qadaǵalawǵa alınıp, orınlanıwı boyınsha anıq múddetler hám juwapkerler belgilendi.