Qaraózekte xalıq penen ashıqtan-ashıq sóylesiw: Puqaralardıń mashqalalarına ornında sheshim izlendi
2026-06-27 17:00:00 / Ministrlik
Ashıq ruwxta ótken qabıllaw dawamında 15 puqara ózleriniń jeke hám sociallıq máseleleri menen múrájat etti. Múrájatlardıń tiykarǵı mánisi sociallıq qorǵaw, bántlikti támiyinlew, ishki jollardı ońlaw, kadastr, medicinalıq járdem alıw hám basqa da máseleler boyınsha múrájatlar bildirildi.
Itibarlı tárepi, hár bir múrájat tek ǵana jazıp qoyılmay, juwapkerlerdiń qatnasıwında hár tárepleme tallandı. Kóterilgen mashqalalardıń salmaqlı bólegi ornında sheshilgen bolsa, tereń úyreniw hám waqıt talap etetuǵın máseleler boyınsha tiyisli uyımlardıń basshılarına anıq múddetli tapsırmalar júklendi.
Xalıq penen pikirlesiw — bul tek ǵana rásmiy ilaj yamasa esabat ushın sanlar emes, al insanlardıń táǵdirine baylanıslılıq úlgisi bolıp esaplanadı. Qaraózek rayonında bolıp ótken bul qabıllaw tek ǵana puqaralardıń mashqalaların jeńillestiriwge emes, al olardıń mámleketke hám ádillikke bolǵan isenimin jáne de bekkemlewge xızmet etti. Sebebi, eń ullı maqset - hár bir puqaranıń turmısınan razı bolıp jasawına erisiw bolıp esaplanadı.