Samarqand qalasında Global ekologiyalıq fondınıń (GEF) 8-assambleyası sheńberinde BMShnıń Azıq-awqat hám awıl xojalıǵı shólkemi (FAO) wákilleri hám Qaraqalpaqstan Respublikası Ministrler Keńesi delegaciyası ortasında potencial joybarlar dodalandı
2026-06-08 09:35:00 / Ministrlik
Samarqand qalasında Qaraqalpaqstan Respublikası Ministrler Keńesi Baslıǵınıń orınbasarı V. Jollıbekov basshılıǵındaǵı Qaraqalpaqstan delegaciyası, Ózbekstan Respublikası Ekologiya hám klimat ózgeriwi milliy komiteti baslıǵınıń orınbasarı J. Kazbekov hám BMShnıń Azıq-awqat hám awıl xojalıǵı shólkeminiń (FAO) Jer hám suw resursları bólimi direktorı Li Lifen hám FAOnıń Ózbekstandaǵı wákili orınbasarı Sh. Umarov ortasında rásmiy ushırasıw bolıp ótti.
Ushırasıwda tiykarǵı itibar Aral teńizine kollektor-drenaj suwların jóneltiriw hám aymaqta suw resursların turaqlı basqarıw joybarına qaratılıp, bul baslama boyınsha keń sóylesiwler alıp barıldı.
Sóylesiwler dawamında bul potencial joybar sheńberinde keleshektegi ámeliy qádemler hám birge islesiw jónelisleri belgilep alındı. Sonıń ishinde, joybardıń qarjılıq hám texnikalıq mexanizmlerin ele de anıqlastırıw maqsetinde Jasıl klimat fondı (GCF), FAO shólkemi hám Qaraqalpaqstan Respublikası Ministrler Keńesi wákilleri qatnasıwında úsh tárepleme ushırasıw shólkemlestiriw hám dodalawlardı dawam ettiriw boyınsha kelisimge erisildi.