Mámleketimiz ǵárezsizliginiń 35 jıllıǵına arnalǵan oqıw-seminarı shólkemlestirildi
2026-05-21 09:50:00 / Ministrlik
Jas áwladtı Watanǵa sadıqlıq hám milliy maqtanısh ruwxında tárbiyalaw maqsetinde ótkerilgen ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı T.Atamuratov, Qaraqalpaqstan Jazıwshılar awqamınıń baslıǵı K.Kárimov, Muhammed ibn Ahmed ál-Beruniy atındaǵı orta arnawlı islam oqıw ornı direktorınıń orınbasarı Q.Mámbetov, institut professor-oqıtıwshıları, tyutorlar, student-jaslar qatnastı.
Ilajdı institut rektorı w.a. Q.Qodirov basqarıp bardı.
Oqıw-seminarı dawamında ǵárezsizlik jıllarında elimizde ámelge asırılǵan keń kólemli reformalar, bilimlendiriw sistemasında erisilgen tabıslar, jaslar ushın jaratılıp atırǵan imkaniyatlar hám mámleketlik rawajlanıwdıń baslı baǵdarları haqqında maǵlıwmatlar berildi.
Sózge shıqqanlar tárepinen ǵárezsizlik xalqımız ushın eń ullı baylıq ekeni, onıń tiykarında tınıshlıq, paraxatshılıq, milliy qádiriyatlar hám abadan turmıs jámlengenligi ayrıqsha atap ótildi.
Ilajda ǵárezsizliktiń tariyxıy áhmiyeti, milliy mámleketshilikti rawajlandırıwdaǵı ornı, sonday-aq, Jańa Ózbekstandı qurıw jolında ámelge asırılıp atırǵan dóretiwshilik jumısları kórsetip ótilip, qatnasıwshılar óz ara pikir almastı.
Xalqımız ardaǵındaǵı kórkem óner ǵayratkerleri atqarıwındaǵı ana Watan haqqındaǵı qosıqlar qatnasıwshılarǵa milliy maqtanısh sezimlerin baǵıshladı.
🤩«Ǵárezsizlik saatı» oqıw-seminarı jaslar arasında ǵárezsizlikti qorǵaw, onıń qádirine jetiw hám Watan rawajlanıwı jolında shın júrekten xızmet etiw muqaddes wazıypa ekenligin tereń ańlaw, sonday-aq, olardı Watanǵa muhabbat ruwxında tárbiyalawda áhmiyetli baslamalardıń biri boldı.