Agrar tarawda xalıqaralıq birge islesiw keńeymekte: jańa investiciyalıq joybarlar dodalaw orayında
2026-05-14 10:35:00 / Ministrlik
Sóylesiw dawamında tárepler awıl xojalıǵı ónimlerin jetistiriw nátiyjeliligin arttırıw, joqarı ónimdarlı sortlardı engiziw, zamanagóy suwǵarıw hám agrotexnikalıq usıllardı qollanıw boyınsha óz-ara tájiriybe alıstı. Ásirese, kartoshka jetistiriw baǵdarında eksportqa jaramlı hám zúráátli sortlardı aymaqtıń klimatına beyimlestiriw máselelerine ayrıqsha itibar qaratıldı.
Sonday-aq, sharwashılıqtı rawajlandırıw, násilli sharwa bas sanın kóbeytiw, ot-jem bazasın bekkemlew hám qayta islew sistemasın jolǵa qoyıw boyınsha perspektivalı usınıslar bildirildi. Pakistanlı investorlar aymaqtıń awıl xojalıǵı potencialı, bar imkaniyatları hám mámleket tárepinen jaratılıp atırǵan qolaylı investiciyalıq ortalıqtı joqarı bahaladı.
Ushırasıw juwmaǵında tárepler óz-ara paydalı birge islesiwdi bunnan bılay da bekkemlew, birgeliktegi joybarlardı basqıshpa-basqısh ámelge asırıw hám agrar tarawda jańa jumıs orınların jaratıwǵa xızmet etetuǵın baslamalardı qollap-quwatlawǵa tayar ekenligin bildirdi.