Qaraqalpaqstan Respublikası Ministrler Keńesi

Bul ilajda taraw qánigeleri, tiyisli shólkemlerdiń wákilleri hám aymaqlardan rayon hákimleri videokonferenciya baylanısı arqalı qatnastı. Ushırasıw dawamında málimleme qáwipsizligin támiyinlew, jeke maǵlıwmatlardı qorǵaw, kiber qáwip-qáterlerdiń aldın alıw hám olarǵa qarsı nátiyjeli gúresiw máseleleri boyınsha keńnen dodalawlar alıp barıldı.

Ilajda Ishki isler ministri Baxtiyar Torebekov shıǵıp sóylep, mámleketimizde kiber qáwipsizlikti támiyinlew baǵdarında ámelge asırılıp atırǵan reformalar, bar qáwip-qáterler hám olardıń aldın alıw boyınsha kórilip atırǵan ilajlar haqqında tolıq maǵlıwmatlar berdi. Sonday-aq, ministr tárepinen sanlı mákanda puqaralardıń huqıqları menen máplerin qorǵaw, málimleme qáwipsizligi mádeniyatın arttırıw hám profilaktikalıq jumıslardı kúsheytiw zárúr ekenligi ayrıqsha atap ótildi.

Sonday-aq, zamanagóy kiberqáwip-qáterler, atap aytqanda, zıyanlı baǵdarlamalar hám internet tarmaǵında ushırasıwı múmkin bolǵan basqa da qáwip-qáterler haqqında túsinikler berilip, qatnasıwshılarǵa málimleme qáwipsizligi qaǵıydalarına qatań ámel etiw, kúshli parollerden paydalanıw boyınsha ámeliy usınıslar berildi.

Ushırasıw juwmaǵında kiber qáwipsizlik mádeniyatın arttırıw, xalıqtıń sanlı sawatlılıǵın arttırıw hám jaslardı hár qıylı kiber qáwip-qáterlerden qorǵawǵa qaratılǵan jumıslardı izbe-iz dawam ettiriw áhmiyetli ekenligi atap ótildi.