Ellikqala rayonında jańa mektep paydalanıwǵa tapsırıldı
2026-04-09 10:20:00 / Ministrlik
Ellikqala rayonında ótkerilip atırǵan "Aqshakól ilhamları" respublikalıq dóretiwshilik tańlawı sheńberinde aymaqta túrli mádeniy-aǵartıwshılıq ilajlar joqarı dárejede shólkemlestirildi.
Usı múnásibet penen "Ixlos" máhállesinde jańa 75-sanlı ulıwma bilim beriw mektebiniń saltanatlı ashılıw máresimi bolıp ótti. Onda tańlaw shólkemlestiriw toparınıń aǵzaları, húrmetli miymanlar, keń jámiechilik wákilleri, nuraniylar, jaslar hám taraw qánigeleri qatnastı.
Bul mektep Ózbekstan Respublikası Prezidentiniń "Awıllıq orınlardı turaqlı rawajlandırıw" joybarın ámelge asırıwǵa baylanıslı qararı tiykarında qurıldı. Ulıwma bahası 9 milliard 900 million sumdı quraytuǵın bul bilimlendiriw ornı 220 orınǵa mólsherlengen.
Zamanagóy talaplarǵa tolıq juwap beretuǵın bul mektepte oqıwshılar ushın barlıq zárúr sharayatlar jaratılǵan. Bul iygilikli jumıslar jas áwladqa bolǵan itibar hám ǵamqorlıqtıń jáne bir ayqın kórinisi bolıp esaplanadı.