QMUda "Basshı hám jaslar" ushırasıwı bolıp ótti
2026-04-04 09:25:00 / Ministrlik
Bul ilaj jaslar menen ashıqtan-ashıq sóylesiw ornatıw, olardıń usınıs hám baslamaların qollap-quwatlaw jáne ekonomikalıq tarawda bilim hám kónlikpelerin bekkemlewge qaratıldı.
Ushırasıwda Qaraqalpaqstan Respublikası Ministrler Keńesi Baslıǵınıń investiciya hám sırtqı sawda máseleleri boyınsha orınbasarı Vladimir Jollıbekov qatnastı. Ilajdı Ekonomika fakulteti dekanı Kishibay Kudiyarov basqarıp bardı.
Sóylesiw dawamında Vladimir Jollıbekov mámleketimizde alıp barılıp atırǵan ekonomikalıq reformalar, investiciyalıq ortalıqtı jaqsılaw hám sırtqı sawda baylanısların keńeytiw baǵdarındaǵı jumıslar haqqında tolıq maǵlıwmat berdi. Sonday-aq, ol jas qánigelerdiń bul processlerdegi ornı, olardıń zamanagóy bilim hám kónlikpelerge iye bolıwı zárúrligin ayrıqsha atap ótti.
Ushırasıw dawamında studentler ózlerin qızıqtırǵan sorawlar menen múrájat etip, investiciya, biznesti rawajlandırıw hám xalıqaralıq ekonomikalıq baylanıslar boyınsha zárúr usınıslar aldı.