Energetika tarawında jańa investiciyalıq joybarlar dodalandı
2026-03-30 19:30:00 / Ministrlik
Aymaqta sanaat infrastrukturasın rawajlandırıw hám energiya támiynatınıń turaqlılıǵın támiyinlew maqsetinde Qıtay Xalıq Respublikasınan kelgen investorlar menen ushırasıw shólkemlestirildi. Bul ushırasıwda joqarı kúshleniwli hám tómen kúshleniwli konteyner túrindegi kúsh transformator úskenelerin jáne elektromobillerdi quwatlaw úskenelerin islep shıǵarıw boyınsha birge islesiw perspektivaları dodalandı.
Sóylesiw dawamında sırt el investorları ushın mámleketimizde jaratılǵan qolaylı investiciyalıq ortalıq, salıq hám bajıxana jeńillikleri, sonday-aq, erkin ekonomikalıq zonalardıń imkaniyatları haqqında tolıq maǵlıwmatlar berildi. Atap ótilgenindey, ámelge asırılıp atırǵan keń kólemli reformalar sırt el investorları ushın jáne de keń imkaniyatlar esigin ashpaqta.
Bunnan soń, tárepler zamanagóy energetika úskenelerin aymaqta lokalizaciyalaw tiykarında óndiristi jolǵa qoyıw máselesin hár tárepleme kórip shıqtı. Joybardı ámelge asırıw arqalı jańa jumıs orınların jaratıw, aldınǵı texnologiyalardı tartıw hám aymaqtıń eksport potencialın arttırıw názerde tutılmaqta.
Ushırasıw juwmaǵında tárepler óz-ara paydalı birge islesiwdi bunnan bılay da rawajlandırıw, keleshekte anıq joybarlardı turmısqa engiziw boyınsha kelisimlerge eristi. Bul baslama aymaqtıń sanaat potencialın bekkemlewde úlken áhmiyetke iye bolıwı kútilmekte.