Qaraqalpaqstan Respublikası Ministrler Keńesi

Mámleketimizde qurılıs hám turaq jay qurılısı tarawında aldınǵı tájiriybelerdi engiziw, zamanagóy kózqaraslardı keńnen qollanıw hám óz-ara paydalı birge islesiwdi rawajlandırıw jolında jáne bir áhmiyetli qádem qoyıldı. Búgin Qıtay kompaniyası menen birge islesiw haqqındaǵı memorandumǵa qol qoyıldı.

Bul hújjet eki tárep arasında ekonomikalıq hám sociallıq áhmiyetke iye bolǵan joybarlardı ámelge asırıw, tájiriybe almasıw hám innovaciyalıq rawajlanıwdı qollap-quwatlawǵa xızmet etedi. Memorandum sheńberinde bir qatar perspektivalı baǵdarlarda birge islesiw belgilep alındı.

Atap aytqanda, kelisimge muwapıq, Xojeli rayonında qurılısı rejelestirilgen "Jaslar sociallıq-ekonomikalıq orayı"n zamanagóy infrastrukturaǵa iye sociallıq taraw obektleri, mádeniy-aǵartıwshılıq orayları, IT baǵdarındaǵı bilimlendiriw mákemeleri, joybarlaw ofisleri hám startaplar texnoparki shólkemlestiriliwi názerde tutılǵan.

Sonday-aq, jaslardıń bántligin támiyinlewge qaratılǵan óndiris kárxanaların iske qosıw, innovaciyalıq ideyalardı qollap-quwatlaw, startap joybarlardı rawajlandırıwǵa ayrıqsha itibar qaratıladı. Birge islesiw sheńberinde qánigelerdi kásiplik tayarlaw hám olardıń mamanlıǵın arttırıwǵa qaratılǵan bilimlendiriw joybarların ámelge asırıw da áhmiyetli baǵdar sıpatında belgilengen.

Bunnan tısqarı, injenerlik xızmetlerin rawajlandırıw, arzan turaq jay qurılısı joybarların alǵa qoyıw, kommunallıq infrastrukturanı modernizaciyalaw, investiciyalıq joybarlardı qollap-quwatlaw hám qurılıs tarawına grant qarjıların tartıw boyınsha birge islesiwdi jolǵa qoyıw rejelestirilgen.

Bul memorandum eki tárepleme birge islesiwdi jańa basqıshqa alıp shıǵıp, aymaqlarda zamanagóy infrastrukturanı qáliplestiriw, ekonomikalıq belsendilikti arttırıw hám eń áhmiyetlisi, jaslar ushın keń imkaniyatlar jaratıwǵa xızmet etedi.