Beruniyli jaslardıń usınıs hám mashqalaları úyrenildi
2026-03-27 09:15:00 / Ministrlik
Hár hápteniń piyshembi kúnin "Jaslar kúni" dep belgilewi usı kúnde barlıq basshılar jaslar menen ushırasqan halda, olardıń múrájatların ornında úyreniwi hám sheshiwi belgilengen bolıp, búgin Beruniy rayonı jasları menen Qaraqalpaqstan Respublikası Ministrler Keńesi baslıǵı F.Ermanovtıń ushırasıwı bolıp ótti. Dáslep mámleketimizde jaslarǵa jaratılıp atırǵan jeńillikler oqıp esittirildi.
Aymaqta basshılarǵa biriktirilgen jaslar menen sáwbetlesti, olardıń pikir-usınısları tıńlandı. Beruniy rayonında 50.563 jas xatlaw nátiyjesinde máhálle jaslar jetekshileri tárepinen anıqlanǵan. Sonnan, 532 jumıssız jaslar rayon dárejesindegi 37 shólkem basshılarına dizim tiykarında biriktirilgen. Olar menen mánzilli islesiw, turaqlı jumısqa jaylastırıw, mashqalaların óz waqtında sheshiw boyınsha basshılardıń ámeliy jumısları kórip shıǵıldı hám kemshiliklerge jol qoyǵan basshılar qatań eskertildi.
Búgingi kúnge shekem basshılarǵa biriktirilgen jaslardan 164 iniń bántligi támiyinlengen bolıp, rásmiy migraciyadaǵı jaslar menen turaqlı baylanıslar ornatılǵan. Ushırasıw dawamında jaslardıń múrájatları úyrenildi. Respublikalıq dárejedegi basshılarǵa anıqlanǵan máselelerdi qısqa waqıt ishinde sheshiw boyınsha tapsırmalar berildi.