Aymaqlarda xalıqtıń múrájatları úyrenildi hám ámeliy ilajlar belgilendi
2026-03-17 19:00:00 / Ministrlik
Búgin Qaraqalpaqstan Respublikası Ministrler Keńesi Baslıǵınıń qurılıs, tosıqlarsız ortalıq jaratıw, kommunikaciyalar, kommunal xojalıq, ekologiya hám kóklemzarlastırıw máseleleri boyınsha orınbasarı T.Yusupov Xojeli rayonında, sonday-aq, Ministrler Keńesi Baslıǵınıń Jámiyetlik hám diniy shólkemler menen baylanıslar boyınsha orınbasarı A.Allanazarov Shımbay rayonında bolıp xalıqtıń múrájatların tıńladı.
Bolıp ótken kóshpeli qabıllawlardıń hár birinde puqaralar tárepinen 10 ǵa shamalas múrájatlar bildirildi. Bul múrájatlar sociallıq, ekonomikalıq, qurılıs hám huqıqıy máselelerdi qamtıp aldı. Bildirilgen hár bir múrájat boyınsha tiyisli tártipte huqıqıy túsinikler berildi. Sonday-aq, jedellik penen sheshiliwi múmkin bolǵan mashqalalar ornında saplastırıldı, qosımsha úyreniw talap etiletuǵın máseleler bolsa juwapkerlerdiń qadaǵalawına alındı.
Kóshpeli qabıllawlar procesinde xalıqtıń turmıs sharayatın jaqsılaw, bántligin támiyinlew, kommunallıq xızmetlerdiń sapasın arttırıw, infrastrukturanı rawajlandırıwǵa baylanıslı bir qatar pikir-usınıslar bildirildi. Usı usınıslar tiykarında anıq ilajlar rejesi islep shıǵılatuǵını belgilendi.
Bul ushırasıwlar puqaralar menen tikkeley sóylesiwdi kúsheytiw, olardıń isenimin bekkemlew hám bar mashqalalardı sistemalı túrde sheshiwge xızmet etpekte.