Sırt elli diplomatlarǵa Qaraqalpaqstannıń investiciyalıq hám sanaat potencialı tanıstırıldı
2026-02-26 11:00:00 / Ministrlik
Dáslep miymanlarǵa Qaraqalpaqstanda jaratılǵan sharayatlar hám jaratıp berilgen imkaniyatlar keń túrde tanıstırıldı. Bunnan soń, iri investiciyalıq joybarlar jumısları barıp kórildi.
Sırt elli miymanlar I.V.Savickiy atındaǵı Qaraqalpaqstan mámleketlik kórkem óner muzeyinde bolıp, «Sahradaǵı luvr» eksponatları menen jaqınnan tanıstı.
Aralboyı xalıqaralıq innovaciya orayında Aral teńizi qurıwınıń aqıbetlerin jumsartıw baǵdarında ámelge asırılıp atırǵan joybarlarda kózden ótkerildi.
Bunnan soń ulıwma bahası 67 mln. dollar bolǵan, jılına 50 mıń tonnaǵa shekem ónim islep shıǵarıw quwatlıǵına iye «KARAKALPAK BASALTWOOL» kárxanası jumısları barıp kórildi.
Sonday-aq, miymanlar ulıwma bahası 48,5 mln. dollar bolǵan, jılına 18 mıń tonna iyirilgen jip islep shıǵarıw quwatlıǵına iye hám 400 jumıs ornın jaratatuǵın «Nókis SSP Texnopark» kárxanası menen jaqınnan tanıstı.
Elimizdiń eksport potencialına úles qosatuǵın jáne bir kárxana - jılına 640 mıń metr radiator ónimlerin islep shıǵarıw quwatlıǵına iye bolatuǵın «Osten Technologies» kárxanası jumısları da barıp kórildi.