Zamanagóy paxtashılıq: nátiyjelilikke jańa qádem
2026-02-23 11:55:00 / Ministrlik
Seminarǵa Qaraqalpaqstan Respublikası Ministrler Keńesiniń Baslıǵı F.Ermanov basshılıq etti. Onda Tórtkúl, Ellikqala, Ámiwdárya hám Beruniy rayonlarınıń hákimleri, taraw qánigeleri hám fermerler qatnastı.
Seminarda paxta maydanların 76x10 sm.li eki qatarlı sxemaǵa ótkeriwdiń abzallıqları hár tárepleme kórip shıǵıldı. Bul usıl bir gektardaǵı túp sanın kóbeytiw arqalı ónimdarlıqtı arttıradı, sonıń menen birge paxta teriw texnikalarınıń nátiyjeli islewin támiyinleydi. Plyonka astına egiw bolsa ıǵallıqtı saqlaw, tóginlerdiń nátiyjeliligin arttırıw hám nállerdiń birdey ónip shıǵıwına xızmet etedi.
Ámeliy processte zamanagóy seyalka hám kultivatorlardıń islew tártibi kórsetildi, fermerlerge anıq usınıslar berildi.
Usı jılı Tórtkúl rayonında 2090 gektar maydanda plyonka astına eki qatar usılında shigit egiw, 5710 gektar ashıq maydanda bolsa eki qatar sxemasın qollanıw rejelestirilgen.
Sonday-aq, ǵálleni birinshi azıqlandırıw, atız zúráátin arttırıw, awıl xojalıǵı texnikaların máwsimge tayarlaw hám 2026-jıl ónimi ushın kartoshka jetistiriw máseleleri de dodalandı.
Seminar juwmaǵında hár bir rayon hákimi 2026-jıl ónimi ushın eki qatar usılında shigit egiw boyınsha belgilengen rejeleri menen tanıstırdı.
Sebebi, aldıńǵı texnologiyalardı ámeliyatqa engiziw - joqarı zúráát hám turaqlı rawajlanıw girewi bolıp esaplanadı.