Korrupciyaǵa qarsı qatań hám sistemalı gúres — rawajlanıwdıń áhmiyetli shárti
2026-01-27 10:40:00 / Ministrlik
2025-jıl 26-dekabr kúni húrmetli Prezidentimizdiń Ózbekstan Respublikası Oliy Majlisine hám xalqımızǵa jollaǵan gezektegi Múrájatı mámleketimizdiń rawajlanıwında jańa basqıshtı baslap berdi. Onda jámiyet hám mámlekettiń rawajlanıwına tosqınlıq etip atırǵan mashqalalar ashıq hám sın kózqarasta tallanıp, olardı saplastırıwǵa qaratılǵan anıq wazıypalar belgilendi.
Múrájatta korrupciya illetine qarsı gúresiw máselelerine ayrıqsha itibar qaratıldı. Atap ótilgenindey, korrupciya tek ǵana ekonomikalıq ósiwge emes, al ádillik, nızam ústinligi hám puqaralardıń mámleketke bolǵan isenimine úlken zıyan jetkermekte. Sonlıqtan bul illetke qarsı gúresiwdi jańa basqıshqa alıp shıǵıw mámleketlik siyasattıń tiykarǵı baǵdarı sıpatında belgilendi.
Prezidentimiz bul máselede qatań poziciyasın bildirip, "Elimizde korrupciyaǵa qarsı gúresiw boyınsha 2026-jılı "ayrıqsha jaǵday" járiyalaymız," dep atap ótti. Bul pikir mámleketlik basqarıwda ashıq-aydınlıqtı támiyinlew, juwapker shaxslardıń juwapkershiligin kúsheytiw hám korrupciyalıq jaǵdaylarǵa pútkilley mawasasız múnásibetti qáliplestiriwge qaratılǵan áhmiyetli siyasiy erk-ıqrardıń ayqın kórinisi bolıp esaplanadı.
Múrájatta belgilengen wazıypalar korrupciyaǵa qarsı gúresiwde barlıq mámleketlik uyımlar, jámiyetlik institutlar hám puqaralardıń belsene qatnasıwın talap etedi. Nızam ústinligin bekkemlew, mámleketlik xızmetlerdi sanlastırıw, ashıq-aydınlıqtı keńeytiw arqalı bul illetke shek qoyıw múmkin ekenligi ayrıqsha atap ótildi.
Usı tárizde, Prezidentimizdiń Múrájatında alǵa qoyılǵan ideyalar hám baslamalar mámleketimizde korrupciyadan jıraq ortalıqtı qáliplestiriw, ádalatlı jámiyet qurıw hám turaqlı rawajlanıwǵa erisiwde áhmiyetli baǵdarlamalıq xızmet etedi.