Qaraqalpaqstan Respublikası Ministrler Keńesiniń Baslıǵı Farxod Ermanov Koreyanıń "Haeorum ESS Energy co.,ltd" kompaniyası bas direktori Kim Ki Jo menen ushırasıwı bolıp ótti.
2026-01-26 12:00:00 / Ministrlik
Ushırasıw dawamında aymaqta zamanagóy, ekologiyalıq taza hám energiya únemlewshi "jasıl" data-oray qurıw joybarın ámelge asırıw máseleleri hár tárepleme dodalandı.
Tárepler málimleme texnologiyaları infrastrukturasın rawajlandırıw, sanlı xızmetlerdiń sapasın arttırıw hám qayta tikleniwshi energiya dáreklerinen nátiyjeli paydalanıw boyınsha pikir alıstı. Atap ótilgenindey, bul joybar aymaqtıń investiciyalıq tartımlılıǵın arttırıw, jańa jumıs orınların jaratıw hám sanlı ekonomikanı rawajlandırıwǵa xızmet etedi.
Ushırasıw juwmaǵında joybardı ámelge asırıwdıń shólkemlestiriwshilik-huqıqıy tárepleri, birge islesiw mexanizmleri hám aldaǵı ámeliy qádemler boyınsha kelisimlerge erisildi. Tárepler bul baslamanı basqıshpa-basqısh turmısqa engiziwden mápdar ekenin bildirdi.