Moynaq kóshesinde kompleksli ońlaw hám jaqtılandırıw jumısları dawam etpekte
2026-01-19 16:35:00 / Ministrlik
Moynaq rayonında infrastrukturanı rawajlandırıw, xalıqtıń qolaylı hám qáwipsiz háreketleniwin támiyinlew maqsetinde keń kólemli dóretiwshilik jumısları ámelge asırılmaqta. Atap aytqanda, Húrmetli Prezidentimizdiń 4889-sanlı qararı tiykarında Moynaq kóshesi boylap zamanagóy talaplarǵa juwap beretuǵın piyadalar jolınıń qurılısı jedel pátlerde alıp barılmaqta. Sonıń menen birge, kóshe aymaǵında túngi jaqtılandırıw sistemaların ornatıw jumısları da izbe-iz dawam ettirilmekte.
Atap ótiw orınlı, 2025-jıl dawamında Moynaq kóshesinde jol infrastrukturasın túp-tiykarınan jaqsılawǵa qaratılǵan jumıslar tolıq juwmaqlanıp, kóshe boylap sapalı qara qaplamalı asfalt tósew jumısları tabıslı orınlandı. Bul jumıslardıń nátiyjesinde kósheniń háreketleniw qolaylıǵı hám kórinisi sezilerli dárejede jaqsılandı.
Ámelge asırılıp atırǵan bul joybarlar Moynaq rayonınıń zamanagóy kelbetin qáliplestiriw, xalıqtıń turmıs dárejesin arttırıw hám aymaqtı jáne de abat hám bereketli orınǵa aylandırıwǵa xızmet etpekte.