Qaraqalpaqstan Respublikası Ministrler Keńesi

Ózbekstan Respublikasınıń «2026-jıl ushın Ózbekstan Respublikasınıń Mámleketlik byudjeti haqqında»ǵı Nızamı basshılıqqa alınıp, Parlament qararı menen Qaraqalpaqstan Respublikası byudjetiniń 2026-jılǵı dáramatları 3 815,5 mlrd. sum hám qárejetleri 6 314,0 mlrd. sum muǵdarında hám de respublika byudjetinen ajıratılatuǵın tártipke salıwshı  byudjetleraralıq transfertler 2 498,5 mlrd. sum muǵdarında belgilendi.

Respublikamızdıń 2026-jıl ushın tastıyıqlanǵan jergilikli byudjet (6 314,0 mlrd. sum) qárejetleriniń 66,1 procenti xalıqtı sociallıq qollap-quwatlawǵa, 11,9 procenti ekonomika qárejetlerine, 3,4 procenti oraylasqan investiciyalardı qarjılandırıwǵa, 11,1 procenti mámleketlik basqarıw uyımların saqlawǵa, qalǵanı saqlawlı, puqaralardıń belsendi qorlarına hám basqa qárejetlerge jumsalıwı názerde tutılǵan.

Bıyılǵı jergilikli byudjet parametrlerinde xalıqtı sociallıq qollap-quwatlawǵa ótken 2025-jılǵa qaraǵanda 112,2 procentke, al oraylasqan investiciyalardı qarjılandırıwǵa bolsa, derlik 4 ese kóp qarjı ajıratılǵanlıǵın kóriwge boladı.

Sonday-aq, Qaraqalpaqstan Respublikasın 2026-jılda rawajlandırıwdıń tiykarǵı makroekonomikalıq prognozı hám de 2027-2028-jıllar ushın maqsetli rejeler belgilenip, 2026-jılda jalpı aymaqlıq ónimdi 57,9 trln. sumǵa, al onıń ósiw pátin 6,2 procentke jetkeriw mólsherlengen. Sonıń menen birge, bıyıl sanaat ѳnimlerin islep shıǵarıwda 6,5 procentlik, awıl, toǵay hám balıqshılıq xojalıqlarında ónim jetistiriwde 3,9 procentlik, bazar xızmetlerinde 17,5 procentlik, qurılıs jumıslarında bolsa 8,2 procentlik ósimge erisiw boljaw etilgen.

Qaraqalpaqstan Respublikasınıń 2026-jılǵı jergilikli byudjetin tastıyıqlaw haqqında qabıl etilgen Qaraqalpaqstan Respublikası Joqarǵı Keńesiniń qararı menen jergilikli byudjetke hám mámleketlik maqsetli qorlarǵa túsimlerdiń tolıq jáne óz waqtında kelip túsiwi hám byudjet qarjılarınıń sarıplanıwı ústinen qadaǵalaw ornatıw boyınsha bir qatar mámleketlik uyımlarǵa tiyisli wazıypalar júkletildi.