Sport tarawında 2025-jıl nátiyjeleri, bar kemshilikler hám aldaǵı tiykarǵı rejeler dodalandı
2026-01-08 15:35:00 / Ministrlik
Húrmetli Prezidentimizdiń basshılıǵında 2025-jıl 13-fevral kúni ótkerilgen videoselektor májilisinde belgilengen tapsırmalarǵa muwapıq olimpiada sport túrleri boyınsha úsh basqıshlı "Jańa Ózbekstan Olimpiada shıńları" sport jarısların joqarı dárejede shólkemlestiriw hám usı jarıslar jeńimpazlarınıń "Prezident Olimpiadası" final basqıshında qatnasıwın támiyinlew wazıypaları belgilengen edi.
Ushırasıwda bul jarıslardı ótkeriwden tiykarǵı maqset, 2028-jılı Los-Anjeles qalasında bolıp ótetuǵın Olimpiada oyınlarına sportshılardı sistemalı hám maqsetli tayarlawdan ibarat ekeni atap ótildi.
Májilis dawamında sport federaciyalarınıń jumısı ayrıqsha tallandı. Elimizde sporttı rawajlandırıw ushın keń imkaniyatlar hám zárúr infrastruktura jaratılǵanına qaramastan, ayırım federaciyalardıń jumısında úlken kemshilikler bar ekenligi sın kózqarastan atap ótildi.
2025-jıl kórsetkishleriniń analizi boyınsha, Qılıshpazlıq, Eskek esiw, Voleybol, Sport gúresleri hám hayal-qızlar gúresi, Basketbol, Gandbol, Regbi, Taekvando (WT), Velosport, Gimnastika, Futbol, Boks hám Awır atletika federaciyaları tárepinen jáhán, Aziya hám xalıqaralıq jarıslarda múnásip qatnasıw, joqarı orınlardı qolǵa kirgiziw hám licenziyalar alıw boyınsha belgili jumıslar ámelge asırılǵanı atap ótildi.
Sonıń menen birge, ayırım sport federaciyalarınıń jumısında rejeli jumıs alıp barılmay atırǵanı, selekciya, rezerv sportshılar tayarlaw, trenerler menen islesiw hám xalıqaralıq jarıslarǵa puqta tayarlıq kóriw máseleleri jeterli dárejede shólkemlestirilmegeni anıqlandı.
Májiliste juwapker basshılar hám federaciya basshılarınıń esapları tıńlanıp, bar kemshiliklerdi saplastırıw, jumıs nátiyjeliligin arttırıw hám nátiyjege baǵdarlanǵan sistemalı jumıstı jolǵa qoyıw boyınsha anıq wazıypalar belgilendi. Sonday-aq, sport tarawında jeke juwapkershilikti kúsheytiw, hár bir federaciyadan anıq nátiyje talap etiw zárúr ekenligi qatań atap ótildi.
Májilis juwmaǵında belgilengen wazıypalardıń orınlanıwın támiyinlew boyınsha tiyisli qararlar qabıl etildi.