Investorlar menen perspektivalı joybarlar boyınsha ushırasıw bolıp ótti
2025-12-27 17:00:00 / Ministrlik
Aymaqta investiciyalıq ortalıqtı jáne de jaqsılaw hám innovaciyalıq texnologiyalardı engiziw maqsetinde Qıtay Xalıq Respublikasınan kelgen investorlar menen ushırasıw bolıp ótti. Ushırasıw dawamında jasıl energiya islep shıǵarıw, joqarı nátiyjeli energiya saqlaw sistemaların engiziw hám jańa áwlad esaplaw orayı - Data Centre qurıw boyınsha perspektivalı joybarlardı ámelge asırıw máseleleri hár tárepleme dodalandı. Tárepler bul baǵdarlardıń ekonomikalıq nátiyjeliligi, texnikalıq imkaniyatları hám aymaqtıń bar infrastrukturası menen úylesimliligi boyınsha pikir alıstı.
Sonday-aq, joybarlardı ámelge asırıw procesinde investorlarǵa jaratılatuǵın qolaylı sharayatlar, jeńillikler hám mámleket tárepinen kórsetiletuǵın qollap-quwatlaw mexanizmleri boyınsha tolıq maǵlıwmatlar berildi. Qıtaylı investorlar aymaqtıń investiciyalıq potencialı hám jasıl ekonomika baǵdarında alıp barılıp atırǵan reformalarǵa joqarı baha berdi.
Ushırasıw juwmaǵında tárepler óz-ara birge islesiwdi bunnan bılay da rawajlandırıw, keleshekte anıq joybarlar boyınsha sóylesiwlerdi dawam ettiriw hám tiyisli usınıslar islep shıǵıw boyınsha kelisimge eristi.