Qońırat rayonında xalıq múrájatları boyınsha gezektegi kóshpeli qabıllaw shólkemlestirildi
2025-12-04 11:00:00 / Ministrlik
Qońırat rayonı "Ádebiyat" APJ aymaǵındaǵı Mektepke shekemgi hám mektep bilimlendiriwi bólimine qaraslı 15-sanlı ulıwma bilim beriw mektebi imaratında Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı, Awıl xojalıǵı ministri Shuhrat Teshaevtıń kóshpeli qabıllawı ótkerildi.
Kóshpeli qabıllawda aymaq xalqı, rayon shólkemleriniń basshıları hám tarawǵa baylanıslı juwapker adamlar qatnastı. Onda puqaralar tárepinen awıl xojalıǵı, ishimlik hám suwǵarıw suwı támiynatı, jumıs penen támiyinlew, subsidiyalar, jer ajıratıw, sociallıq járdem máseleleri boyınsha múrájatlar tıńlandı.
Shuhrat Teshaev tárepinen hár bir múrájat boyınsha juwapkerlerge anıq tapsırmalar berilip, olardıń orınlanıwın belgilengen múddetlerde támiyinlew haqqında kórsetpeler berildi. Qabıllaw barısında ayırım máseleler sol jerdiń ózinde sheshilip, puqaralarǵa huqıqıy hám ámeliy járdem kórsetildi.
Bul kóshpeli qabıllaw xalıqtıń mashqalaların úyreniw, olardıń zárúrliklerine tez juwap beriw hám bar máselelerdi mánzilli sheshiwge xızmet etti.