Ministrler Keńesiniń apparat xızmetkerleri ushın mámleketlik tilde is júrgiziw hám latın álipbesi boyınsha oqıw kursı shólkemlestirilmekte.
2025-11-12 10:45:00 / Ministrlik
Mákeme, shólkem, kárxana hám birlespelerdegi jumıstı islep shıǵarıwdıń rawajlanıwına muwapıq shólkemlestiriwde, basqarıw tarawında hújjetlerdiń ornı hám áhmiyeti ayrıqsha. Búgingi kúnde hújjetlerdiń tekstin dúziw basqarıw apparatı jumısındaǵı eń mashaqatlı process. Bul procesti aqılǵa muwapıq alıp barmay hám nátiyjeliligin kúsheytpey turıp, basqarıw mádeniyatın rawajlandırıw múmkin emes. Jámiyetlik turmıstıń barlıq tarawlarınıń jedel rawajlanıwı basqarıw mádeniyatınıń dárejesine tikkeley baylanıslı. Sonıń ushın da mámleketlik organlardıń xızmetkerleri hárqanday zárúr xabardı rásmiy is tiliniń tiyisli formalarında biymálel jetkere alıwı, is júrgiziw kónlikpelerin puqta iyelegen bolıwı zárúr.Usınnan kelip shıǵıp, Ózbekstan Respublikası Prezidentiniń 2025-jıl 20-oktyabrdegi «Mámleketlik tildi jáne de rawajlandırıwǵa baylanıslı qosımsha is-ilajlar haqqında»ǵı PQ-308-sanlı Qararı orınlanıwın támiyinlew maqsetinde Qaraqalpaqstan Respublikası Ministrler Keńesiniń apparat xızmetkerlerinen qaraqalpaq hám ózbek tillerinde diktant alındı.
Mámleketlik tilde is júrgiziw tiykarların oqıtıw hám qánigeligin arttırıw orayınıń Qaraqalpaqstan Respublikası aymaqlıq bólimi tárepinen Qaraqalpaqstan Respublikası Ministrler Keńesiniń apparat xızmetkerleri ushın mámleketlik tilde is júrgiziw hám latın álipbesi boyınsha 4 háptelik oqıw kursı shólkemlestirilmekte.