Basqarma haqqında
QARAQALPAQSTAN RESPUBLIKASÍ AYRÍQSHA JAǴDAYLAR BASQARMASÍ HAQQÍNDA
Qaraqalpaqstan Respublikası Ayrıqsha jaǵdaylar basqarması Ózbekstan Respublikası Ayrıqsha jaǵdaylar ministrligi sistemasındaǵı aymaqlıq mámleketlik basqarıw uyımı esaplanadı. Basqarma Qaraqalpaqstan Respublikası aymaǵında ayrıqsha jaǵdaylardıń aldın alıw, xalıq hám aymaqlardı qorǵaw, órt qáwipsizligin támiyinlew, sonday-aq, qutqarıw hám avariyalıq-tiklew jumısların shólkemlestiriw wazıypaların ámelge asıradı.
Ózbekstan Respublikası Ayrıqsha jaǵdaylar ministrligi Ózbekstan Respublikası Prezidentiniń 1996-jıl 4-marttaǵı PP-1378-sanlı Pármanı tiykarında shólkemlestirilgen. Bul hújjet penen ayrıqsha jaǵdaylardıń aldın alıw, olardıń aqıbetlerin saplastırıw hám puqaralıq qorǵaw tarawında birden-bir mámleketlik sistema qáliplestirilgen. Usı tiykarda respublika boylap aymaqlıq basqarmalar, sonıń ishinde Qaraqalpaqstan Respublikası Ayrıqsha jaǵdaylar basqarması da jumıs isley baslaǵan.
Sistemanı bunnan bılay da jetilistiriw maqsetinde Ózbekstan Respublikası Prezidentiniń 2019-jıl 10-apreldegi PP-5706-sanlı Pármanına muwapıq, Ishki isler ministrligi sistemasındaǵı Órt qáwipsizligi bas basqarması hám onıń aymaqlıq strukturaları Ayrıqsha jaǵdaylar ministrligi sistemasına ótkerildi. Bul reforma nátiyjesinde órt qáwipsizligi hám qutqarıw xızmetleri birden-bir basqarıw sisteması tiykarında birlestirildi.
2025-jılı tarawǵa baylanıslı áhmietli reformalar dawam ettirilip, Ózbekstan Respublikası Prezidentiniń 2025-jıl 20-oktyabrdegi PP-185-sanlı Pármanı jáne PP-310 hám PP-311-sanlı qararları tiykarında ayrıqsha jaǵdaylardan qorǵaw sisteması jańa basqıshqa alıp shıǵıldı.
Usı hújjetlerge muwapıq;
ayrıqsha jaǵdaylardıń erte aldın alıw sisteması túp-tiykarınan jetilistirildi;
máhálle hám shańaraq dárejesinde profilaktika mexanizmleri engizildi;
órt hám texnogen qáwip-qáterlerdi basqarıwdıń zamanagóy sisteması jolǵa qoyıldı;
jasalma intellekt, sanlı texnologiyalar hám monitoring sistemaları keńnen engizildi;
ayrıqsha jaǵdaylar uyımlarınıń jumısın sanlastırıw hám modernizaciyalaw ilajları belgilendi;
xalıqtı operativ eskertiw hám málimleme menen támiyinlew sisteması kúsheytildi.
Basqarmanıń tiykarǵı wazıypaları;
ayrıqsha jaǵdaylardıń aldın alıw;
órt qáwipsizligin támiyinlew;
qutqarıw hám avariya-tiklew jumısların shólkemlestiriw;
tábiyǵıy hám texnogen apachılıqlar aqıbetlerin saplastırıw;
xalıqtı ayrıqsha jaǵdaylarda durıs háreket etiwge úyretiw;
profilaktikalıq hám úgit-násiyat ilajların ótkeriw;
arnawlı-taktikalıq oqıw shınıǵıwların shólkemlestiriw.
Tiykarǵı funkciyaları;
ayrıqsha jaǵdaylar qáwipin monitoring etiw hám tallaw;
órt qadaǵalawın hámde profilaktikasın ámelge asırıw;
aymaqlıq qutqarıw xızmetleriniń jumısın muwapıqlastırıw;
ayrıqsha jaǵdaylarda operativ basqarıwdı shólkemlestiriw;
xalıqtı eskertiw hám málimleme menen támiyinlew;
tiyisli shólkemler menen birgelikte qáwipsizlik ilajların ámelge asırıw.
Búgingi kúnde Qaraqalpaqstan Respublikası Ayrıqsha jaǵdaylar basqarması tárepinen xalıqtıń qáwipsizligin támiyinlew, ayrıqsha jaǵdaylardıń aldın alıw, órt-qutqarıw xızmetleriniń nátiyjeliligin arttırıw hám zamanagóy texnologiyalardı engiziw baǵdarında keń kólemli jumıslar alıp barılmaqta.