Nókiste «TalabaExpo – 2026» kásiplik kórgizbesi bolıp ótti
2026-07-29 18:05:00 / Министрлик
Ilaj Qaraqalpaqstan Respublikası Joqarǵı Keńesi, «Ózmilliybank» AJ, Ózbekstan Respublikası Joqarı bilimlendiriw, ilim hám innovaciyalar ministrligi, Sawda-sanaat palatası, Jaslar isleri agentligi, Kámbaǵallıqtı qısqartıw hám bántlik ministrligi menen birgelikte shólkemlestirildi.
Kórgizbeniń ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev, «Ózmilliybank» AJ «Keleshekke qádem» orayınıń direktorı Elmurod Hoshimov sózge shıǵıp, pitkeriwshilerdiń bántligin támiyinlew, olardıń kásiplik baǵdarın anıqlaw hám biznes baslamaların qollap-quwatlaw maqsetinde ótkerilip atırǵan usı ilajdıń áhmiyetine toqtaldı.
Kórgizbe sheńberinde elimizde jumıs alıp barıp atırǵan kárxana hám shólkemlerdiń bir yarım mıńnan aslam bos jumıs orınları yarmarkası, jumıs beriwshiler hám joqarı oqıw orınlarınıń kórgizbeleri, kommerciyalıq banklerdiń jaslar biznesin qollap-quwatlaw boyınsha prezentaciyaları bolıp ótti.
Sonday-aq, jaslarımızǵa ózin-ózi bánt etiw hám óz biznesin jolǵa qoyıw ushın 100 ge jaqın zárúrli ásbap-úskeneler, úy sharayatında biznes baslaw ushın kommerciyalıq bankler tárepinen jeńilletilgen kredit paketleri usınıldı.