Qaraqalpaqstan Respublikası Bozataw rayonı hákimligi

Keyingi waqıtlarda sud sistemasında sanlı texnologiyalardı engiziw puqaralarǵa qolaylıq jaratıw menen birge, korrupciya qáwpin azaytıwda áhmietli faktor bolıp xızmet etpekte.

Sudlarda interaktiv xızmetlerdiń keńnen engiziliwi insan faktorın qısqartıw, ashıq-aydınlıqtı támiyinlew hám artıqsha byurokratlıq tosqınlıqlardı saplastırıwǵa qaratılǵan.

Interaktiv xızmetler arqalı puqaralar sudqa múrájat etiw, arza hám hújjetlerdi elektron túrde usınıw, jumıs júrgiziw processin onlayn baqlaw imkaniyatına iye bolmaqta. Bul bolsa barlıq processlerdi ashıq-aydın túrde ámelge asırıwǵa xızmet etedi.

Xızmetlerdiń onlayn túrde kórsetiliwi arqalı puqara hám lawazımlı shaxs arasındaǵı tikkeley baylanıs sezilerli dárejede azayadı. Nátiyjede subektiv qatnas, nızamsız kelisimler hám korrupciyalıq jaǵdaylar ushın imkaniyatlar sheklenedi.

Búgingi kúnde sud xızmetleriniń úlken bólegi elektron túrge ótkerilgen bolıp, mıńlaǵan puqaralar usı xızmetlerden paydalanbaqta. Elektron múrájatlar arqalı jumıslardı kórip shıǵıw múddetleri qısqartılıp, puqaralardıń waqıt únemleniwi támiyinlenbekte. Bul kórsetkishler infografika hám ashıq statistikalıq maǵlıwmatlar arqalı jámietshilikke usınılmaqta.

Sudlarda interaktiv xızmetlerdiń engiziliwi korrupciyaǵa qarsı gúresiwde nátiyjeli mexanizm esaplanadı. Ashıq-aydın hám sanlastırılǵan sud sisteması puqaralardıń sudqa bolǵan isenimin arttırıwǵa, nızamlılıq hám ádillikti támiyinlewge xızmet etedi.

Elimizde sud-huqıq sistemasın liberallastırıw, sud hákimiyatınıń erkinligin bunnan bılay da bekkemlew, ádil sudlawdıń sapasın hám nátiyjeliligin arttırıw, jınayat hám jınayat-processual nızamshılıǵında insanıylıq principlerin kúsheytiwge qaratılǵan jumıslardıń kólemi oǵada keńeyip, jańa basqıshlarǵa kóterilip barmaqta.

Sudlarda interaktiv xızmetlerdiń túrin keńeytiw boyınsha jumıslardı jedellestiriw, sud hákimiyatı uyımlarınıń jumısın sanlastırıw arqalı sudlar hám basqa da uyımlar arasında maǵlıwmat almasıwdı jáne de jaqsılaydı.

Qaraqalpaqstan Respublikası

hákimshilik sudınıń

keńse meńgeriwshisi                                                                       A.Koshanov