Oqıwshılardıń joqarı oqıw orınlarına sayaxatı
2026-04-11 10:20:00 / Министрлик
Beruniy rayonı Mektepke shekemgi hám mektep bilimlendiriwi bólimine qaraslı 35-sanlı ulıwma orta bilim beriw mektebinde aprel ayında "Ósiw laboratoriyası" aylıǵında kásipke baǵdarlaw boyınsha "Ilim hám bilimlendiriw" tarawındaǵı kásipler aylıǵı sheńberinde mektep ámeliyachı psixologı N.Reyimbaeva hám de jas óspirimler máseleleri boyınsha inspektor psixolog E.Urazmatovalar menen birgelikte pitkeriwshi 10-11 klass oqıwshıların bilimlendiriwdiń keyingi basqıshın dawam ettiriw, oqıwshılardıń pedagog kásibine bolǵan qızıǵıwshılıǵın jáne de arttırıw maqsetinde Xorezm wálayatındaǵı Abu Rayxan Beruniy atındaǵı Universitetke qánigelikler menen tanıstırıw ushın ushırasıw hám sayaxat shólkemlestirildi. Studentler universitettiń Pedagogika hám psixologiya baǵdarı boyınsha maǵlıwmatlar aldı, trening processlerin baqladı. Onnan keyin tábiyiy pánler laboratoriya xanaları úskeneleri menen tanısıp, tájiriybelerdi baqladı, fizika-matematika baǵdarı boyınsha docent ustaz muǵallimler qızıqlı maǵlıwmatlar berdi. Dene mádeniyatı, tariyx hám huqıq baǵdarı boyınsha, filologiya hám kórkem óner, sırt el filologiyası baǵdarı boyınsha ózin qızıqtırǵan sorawlarına juwap aldı hám sırt elden kelgen ustazlar menen sáwbetlesti. Oqıwshılar ushın bul sayaxat keleshekleri ushın ayrıqsha áhmietke ie boldı.