"Basshı hám jaslar ushırasıwı"
2026-03-27 11:50:00 / Министрлик
Beruniy rayonı Jaslar orayında hár piyshembi kúni dástúriy tárizde shólkemlestirilip kiyatırǵan "Basshı hám jaslar ushırasıwı" sheńberinde gezektegi ushırasıw bolıp ótti. Bul ushırasıw Ózbekstan Respublikası Bas ministriniń orınbasarı Z.Mahkamovanıń qatnasıwında shólkemlestirildi. Onda jaslar menen ashıqtan-ashıq sóylesiw ornatıw, olardıń mashqala hám usınısların tıńlaw, bántligin támiyinlew, isbilermenlikke tartıw hám jaslardı hár tárepleme qollap-quwatlaw máselelerine ayrıqsha itibar qaratıldı. Ushırasıwda rayon hákimligi juwapkerleri, tiyisli shólkem hám uyımlardıń basshıları, belsendi jaslar qatnastı.
Sóylesiw dawamında jaslar tárepinen bilimlendiriw, jumıs penen támiyinlew, isbilermenlik jumısın baslaw, jeńilletilgen kreditler alıw, kásip-óner úyreniw hám bos waqıttı mazmunlı shólkemlestiriwge baylanıslı bir qatar máseleler kóterildi. Sonday-aq, jaslardıń baslamaların qollap-quwatlaw, olardı hár qıylı joybarlarǵa tartıw, sport hám mádeniy ilajlardı keńeytiw arqalı jaslardıń sociallıq belsendiligin arttırıw máseleleri dodalandı.
Juwapkerler tárepinen hár bir múrájat boyınsha tiyisli túsinikler berildi hám ayırım máseleler ornında sheshildi. Qalǵan múrájatlardıń orınlanıwın támiyinlew boyınsha juwapkerlerge anıq wazıypalar júklendi. Ushırasıw juwmaǵında jaslardı qollap-quwatlaw, olardıń mashqalalarına jedel sheshim tabıw hám keleshekte bunday sóylesiwlerdi jáne de nátiyjeli shólkemlestiriw boyınsha tiyisli tapsırmalar berildi.