Prezident Pármanınıń orınlanıwı boyınsha májilis bolıp ótti
2026-03-27 11:25:00 / Министрлик
Ózbekstan Respublikası Bas ministriniń orınbasarı Z.Maxkamova tárepinen Ózbekstan Respublikası Prezidentiniń "Hayal-qızlar hám balalar huqıqlarınıń qorǵalıwın kúsheytiw jáne olarǵa bolǵan kúsh kórsetiw hám zorlıq jaǵdaylarınıń aldın alıw boyınsha qosımsha shólkemlestiriwshilik-huqıqıy ilajlar haqqında"ǵı 33-sanlı Pármanınıń orınlanıwın támiyinlewge baǵıshlanǵan Respublikalıq kólemde ZOOM platforması arqalı májilis shólkemlestirildi. Májiliste rayon hákimliginiń juwapkerleri, Shańaraq hám hayal-qızlar bóliminiń baslıqları, ishki isler bólimleriniń xızmetkerleri, imam-xatibler, máhálleler awqamınıń wákilleri, "Nuraniy" qorınıń belsendileri hám máhállelerdegi hayal-qızlardıń belsendileri qatnastı. Ilaj dawamında usı Pármannıń mazmun-mánisi, onıń áhmieti hám orınlanıwın támiyinlew baǵdarında orınlarda ámelge asırılıwı kerek bolǵan wazıypalar hár tárepleme dodalandı. Atap aytqanda, hayal-qızlar hám balalardıń huqıqların qorǵaw, shańaraqlarda salamat ortalıqtı qáliplestiriw, kúsh kórsetiw hám zorlıq jaǵdaylarınıń aldın alıw boyınsha mánzilli jumıslardı alıp barıw zárúr ekenligi atap ótildi. Sonday-aq, máhálleler kesiminde profilaktikalıq ilajlardı kúsheytiw, mashqalalı shańaraqlar menen mánzilli islesiw, hayal-qızlardı sociallıq qollap-quwatlaw, olardıń bántligin támiyinlew hám huqıqıy sawatlılıǵın arttırıw máselelerine ayrıqsha itibar qaratıldı. Májilis qatnasıwshıları tárepinen tarawdaǵı bar mashqalalar dodalanıp, olardı saplastırıw boyınsha ámeliy usınıslar bildirildi. Barlıq juwapkerlerge Pármannıń orınlanıwın támiyinlew, hayal-qızlar hám balalardı hár tárepleme qorǵaw jáne jámiette salamat sociallıq ortalıqtı qáliplestiriw boyınsha anıq wazıypalar júklendi.