Reformalar menen izbe-iz. Beruniy rayonı mısalında
2026-03-23 21:25:00 / Министрлик
Mámleketimizde hayal-qızlardıń bántligin támiyinlew tiykarǵı wazıypalardan biri. Ásirese, Húrmetli Prezidentimizdiń basshılıǵında alıp barılıp atırǵan aqılǵa uǵras siyasat sebepli hayal-qızlardıń jámiettegi rolin arttırıw, olar menen mánzilli jumıslardıń alıp barılıwı jolǵa qoyılǵan. Beruniy rayonı Azat awıl puqaralar jıyınındaǵı xalıqtıń sanı 7176 adamdı quraydı, sonnan 3664 hayal-qızlar. Aymaqta hayal-qızlardıń salamatlıǵın bekkemlew baǵdarında medicinalıq tekseriwler shólkemlestirilip, hámiledarlıq hám tuwıw jasındaǵı hayallar turaqlı shıpaker tekseriwinen ótkerilip kelinedi. Kekselerdiń halınan xabar alıw maqsetinde 87 jastı qarsı alǵan 10 perzenttiń anası, 110 aqlıq- shawlıqlardıń apası "Qaharman ana" Qızılgúl mama Prenova búgingi kúnde el ardaǵında. Ómiri dawamında awıl xojalıǵında pille, paxta jetistirip, miyneti arqasında qádir tapqan. Búgingi kúnde perzentleriniń ardaǵında, tınısh kúnlerge shúkirshiligi kóp. Máhálle hayal-qızlar belsendisi tárepinen ananıń halınan xabar alınıp, oǵan bayram sawǵaları berildi. Úy sharayatında dáramat tawıp qusshılıq penen shuǵıllanıp atırǵan hayal-qızlar Azat awıl puqaralar jıyınında kópshilikti quraydı. Quslardıń túrli túrlerin, atap aytqanda tawıq, túetawıq, úyrek, kekliklerdi baǵıp erte báhárden olardı kóbeytiwdi jolǵa qoyǵan shańaraqlar bul baǵdardıń ilimin jaqsı ielegen. Jeti ǵaziyneniń biri dep táriyplenetuǵın tawıq góshi hám máegi shańaraqtıń dáramat dáregi bolıp esaplanadı. Aymaqtıń drayver tarawı sharwashılıq hám diyqanshılıq bolıp esaplanıp, endi xızmet kórsetiw tarawı da isbilermenler tárepinen jolǵa qoyılǵan. Xalıqtıń abadan turmıs tárizi, búgingi kúninen razılıǵın máhállelerde ámelge asırılıp atırǵan reformalar mısalında kóriwimiz múmkin.