Maqtanıshlı kásip iesi
2026-03-04 18:05:00 / Министрлик
Shıpaker-denemiz awırǵan waqıtta járdem beretuǵın, óziniń sózi hám usınısı menen emlep, janımızǵa payda keltiretuǵın kásip iesi, sonıń menen birge medicina tarawındaǵı juwapkershilik insannıń ómiri menen baylanıslı. Sonıń ushın bolsa kerek shıpakerler de óz ielegen kásibiniń pidayısı bolıp, jıllar dawamında jumısına ózin baǵıshlaydı. Beruniy rayonınıń alıs aymaǵı Abay awıl puqaralar jıyınındaǵı 8-sanlı shańaraqlıq poliklinikada 32 jıldan berli jumıs alıp barıp atırǵan Svetlana Adilova óz kásibiniń biz aytıp atırǵan pidayı basshılarınıń biri. Miynet jolı dawamında kóplegen insanlardıń dártine dárman bolǵan. Búgingi kúnde Húrmetli Prezidentimizdiń medicina tarawına berip atırǵan itibarı, ana hám bala salamatlıǵı jolında alıp barılıp atırǵan ámeliy háreketleri medicinadaǵı reformalar insan qádiri ushın degen ideyanı óz ishine aladı. Abay awıl puqaralar jıyınındaǵı 8-sanlı shańaraqlıq poliklinikaǵa 8857 puqara biriktirilgen bolıp, sonnan 4323 in hayal-qızlar quraydı. Olarǵa óz waqtında járdem beriw, tekseriwlerden ótkeriw, tuwıw jasındaǵı hám hámiledar hayallarǵa másláhátler beriw boyınsha barlıq jumıslar shólkemlestirilgen. 25 medicina xızmetkeri menen birgelikte tatıw jámáátti quraǵan. Zamanagóy ultrases tekseriwleri, laboratoriya, stomatolog, kardiolog tekseriwleri turaqlı jumıs alıp baradı. Basshı hayal bolıw bul pidayılıq. Juwapkershilikli wazıypa, kúndelikli jumıs, shańaraq hám perzent tárbiyası, tuwısqan-tuwısqanlar arasındaǵı teńsalmaqlılıqtı birdey alıp barıw hayaldan úlken miynet talap etedi. Bunday mártlik tek ǵana hayallarǵa tán boladı desek aljaspaǵan bolamız. Kishkene júregine keń dúnyanı sıydıra alǵan hayal tuqımına qanshelli húrmet kórsetsek arzıydı. Bayram aldınan Watanımızdıń rawajlanıwı ushın tınımsız miynet etip atırǵan barlıq hayal-qızlardı 8-mart "Xalıqaralıq hayal-qızlar kúni" menen qutlıqlaymız.