Qaraqalpaqstan Respublikası Beruniy rayonı hákimligi

Islam álemindegi múbárek Ramazan ayın awızbirshilikte ótkeriw, sociallıq qorǵawǵa mútáj xalıqtı hár tárepleme qollap-quwatlaw maqsetinde Húrmetli Prezidentimizdiń baslaması menen Respublikamız boylap kóplegen qayırlı hám sawaplı isler ámelge asırılmaqta. Bir ǵana Beruniy rayonında kámbaǵallıq reestrinde turǵan sociallıq qorǵawǵa mútáj, mayıplıǵı bolǵan, jalǵız jasawshı 5854 shańaraqqa Prezidentimizdiń Ramazan ayı múnásibeti menen bir mártelik materiallıq járdem qarjıları berildi.

Húrmetli Prezidentimizdiń Ramazan ayı kirip keliwi múnásibeti menen xalqımızǵa jollaǵan qutlıqlawında "El-jurtımızdıń sociallıq-ruwxıy turmısında ayrıqsha orın tutatuǵın, insandı iygilikli hám sawaplı islerge shaqıratuǵın bul aydı múnásip túrde ótkeriw maqsetinde bıyıl da mámleketimizde úlken tayarlıq jumısları ámelge asırılmaqta. Sonıń ishinde, máhálle hám turaq jaylar, meshit hám medreselerdi abat etiw, kekseler, mayıp hám járdemge mútáj shaxslardıń halınan xabar alıw, qońsılar, jaqın tuwısqanlarǵa mehir hám itibar kórsetiw, ibadat hám iftar máresimlerin tártipli ótkeriwge shańaraq hám máhálle xalqı, jámiechilik wákilleri tárepinen ayrıqsha áhmiet berilmekte."

Bulardıń barlıǵı biybaha baylıǵımız bolǵan tınıshlıq-tatıwlıq, milletleraralıq tatıwlıq hám diniy keńpeyillik ortalıǵın, insanıylıq principlerin bekkemlew, elimizdiń rawajlanıwı, xalqımızdıń abadanlıǵın arttırıwǵa xızmet etetuǵını tábiyǵıy, álbette. Ramazan ayınıń ullı pazıyletleri, ádep-ikramlılıq-ruwxıy áhmieti áyne mine, usınday ullı islerde ayqın kórinedi, desek, haqıyqattı aytqan bolamız.

Búgin Beruniy rayonında Mámleketlik Bajıxana komiteti hám Beruniy rayonı hákimligi menen birgelikte oraza tutıwshılar ushın iftarlıq dasturxanı jayıldı. Ramazan-mehir-múriwbet, awızbirshilik hám shúkirshilik ayı, bul aydaǵı eń jaqsı hám iygilikli ámellerimiz, hár birimizdiń islegen sawaplı islerimiz ulıǵlanatuǵın ay. Iftarlıq baslanıwı aldınan rayon imam-xatipleri tárepinen Quranı kárim oqılıp, tınıshlıǵımızǵa shúkirshilik bildirilip, reformalarımız dawamlı bolsın dep pátiya oqıldı.

Bir kese shay hám iftarlıq dasturxanı átirapında jaqınlar bir-biri menen mazmunlı hám qızıqlı sáwbetler ótkerdi. Bunday quwanısh tınısh elimizge, keńpeyil xalqımızǵa jarasadı. Ramazan ayı barlıq musılman xalqına múbárek bolsın.