Medicinadaǵı reformalar insan qádiri ushın.
2026-02-26 18:25:00 / Министрлик
Beruniy rayonı medicina bóliminde mámleketlik jeke menshik sheriklik tiykarında investiciya qarjıları esabınan gemodializ bólimi iske qosılıw aldında. Qaraqalpaqstan Respublikasınıń Beruniy hám Qońırat rayonlarında 500 mıń AQSh dolları investiciya qarjıları esabınan mámleketlik jeke menshik sheriklik tiykarında "NEPHROPLUS" búyrek jumısın qollap-quwatlawǵa tiykarlanǵan joybar sheńberinde gemodializ bólimi islep shıǵılıwı baslanǵan. Búyrek jetispewshiliginde kerek bolatuǵın 12 arnawlı medicinalıq apparat 24 saat dawamında 70 jobalastırılǵan dializ nawqaslarına xızmet etedi. Bólim 4 zaldan ibarat. Barlıq zamanagóy qolaylıqlar jaratılmaqta. Oliy Majlis Nızamshılıq palatasınıń deputatı S.Imamova, Qaraqalpaqstan Respublikası Joqarǵı Keńesiniń deputatı K.Xojamuratov usı joybardıń ámelge asırılıw processleri menen tanıstı. Hindstanlı qánigeler menen sáwbetlesiw procesinde búyrek jetispewshiligi nátiyjesinde nawqaslarda baqlanatuǵın processlerdi jergilikli shıpakerler menen birgelikte islesiw ushın barlıq sharayatlar jaratılıp atırǵanın bildirdi. Quwanıshlı tárepi sonda, aldın nawqaslar Xorezm wálayatı yamasa Nókis qalasına saatlap jol basıp rejelestirilgen gemodializ alıw ushın baratuǵın bolsa, endi bul ámeliyat óz rayonımızda jolǵa qoyıladı. Ońlaw hám ornatıw jumısları mart ayınıń aqırına shekem ámelge asırılıp, iske qosılıwı rejelestirilgen. Húrmetli Prezidentimizdiń medicina tarawına berip atırǵan itibarı, millet salamatlıǵın bekkemlew jolındaǵı háreketleri álbette óz nátiyjesin kórsetti.