Jipekshilik tarawın bunnan bılay da rawajlandırıwǵa baǵıshlanǵan seminar bolıp ótti.
2026-02-24 10:05:00 / Министрлик
Elimizde pilleshilik tarawın bunnan bılay da rawajlandırıw, bul baǵdarda jańa tájiriybelerdi hám ilimdi qollanıw arqalı mol zúráát jetistiriw, sonday-aq, awıllıq jerlerde pille jetistiriw arqalı xalıqtı, ásirese, hayal-qızlardı jumıs penen bánt etiw maqsetinde Tashkent mámleketlik agrar universiteti "Jipekshilik hám tut jetistiriw" kafedrası, Jipekshilik ilimiy-izertlew institutı hám Qaraqalpaqstan Respublikası Ministrler Keńesi menen birgelikte Beruniy rayonında rayonlararalıq oqıw seminarı bolıp ótti. Onda Shımbay, Kegeyli, Nókis rayonı, Shomanay, Xojeli, Taqıyatas, Ellikqala, Ámiwdárya, Beruniy hám Tórtkúl rayonlarınıń hákim orınbasarları, Shańaraq hám hayal-qızlar bólimi baslıqları, pilleshilik klasterleri, agronomlar qatnastı. Jipekshilik ilimiy-izertlew institutı xızmetkerleri tárepinen Qaraqalpaqstandaǵı ıssı klimat sharayatında jipekshilik tarawın rawajlandırıwǵa ayrıqsha qatnas jasaw zárúrligi, bul bolsa agronomlardan úlken tájiriybe talap etetuǵının atap ótti. Húrmetli Prezidentimiz tárepinen pilleshilik tarawında qabıl etilip atırǵan qararlar, olardaǵı jeńillikler sebepli kóplegen hayal-qızlardıń bántligi támiyinlenip, olardıń shańaraǵına qosımsha dáramat dárekleri jaratılmaqta. Áyne usı baǵdardaǵı jumıslardıń rawajlanıwına baǵıshlanǵan seminar dawamında qatnasıwshılar ózleri ushın áhmietli maǵlıwmatlarǵa ie boldı hám tarawǵa baylanıslı sorawlarǵa juwaplar aldı.