Қарақалпақстан Республикасы Беруний районы ҳәкимлиги

Hayal-qızlardıń bántligin támiyinlew, olardıń dáramat tabıwına járdemlesiw, sociallıq jaǵdayın bunnan bılay da jaqsılawǵa qaratılǵan ámeliy jumıslardıń nátiyjesinde máhállelerde hayal-qızlar isbilermenligi jáne de kóbeymekte. Beruniy rayonı Shimom awıl puqaralar jıyını aymaǵında 3 900 hayal-qız jasaydı. 6-basqısh "Hayal-qızlar dápteri"ne aymaqtan 180 hayal-qız kirgizilgen. Olardıń isbilermenlik penen shuǵıllanıwına máhálle tárepinen bir qatar ámeliy járdemler berildi. Atap aytqanda, Aziza Ermanova úsh perzenttiń anası. Úyinde tigiwshilik penen shuǵıllanadı. Eski tigiw mashinasında jumıs ónimdarlıǵına erise almaǵan soń, máhálleden jańa tigiw mashinası alıwda járdem soraydı. Ssuda tiykarında jańa, zamanagóy tigiw mashinası jáne jeńilletilgen 5 million sum kredit berilip, tigiwshilik ónerin baslawǵa járdem beriledi. Nátiyjede toy-merekeler ushın buyırtpa tiykarında kórpe, kórpeshe, kópshikler tigip, jumıs iskerligin keńeytedi. Jumıssız hayal-qızlarǵa óz ónerin úyretip, úy sharayatında pishiw-tigiwdi keńeytedi. Ayına 3-4 million sum dáramat tawıp, shańaraqtıń abadanlıǵına óz úlesin qosıp kelmekte.

"Hayal-qızlar dápteri"ne dizimge alınǵan Ulbasın Nurullaevaǵa jeńilletilgen dáwir menen 33 mln sumlıq kredit berilgen. Nan jabıw ushın kerekli ásbap-úskeneler satıp alıp, óz jumısın baslaǵan. Házirde xalqımızdıń jaqsı kúnlerinde nan jawıp, xızmet etip keledi. 2 jańa jumıs ornın jaratqan. Jumısın keńeytip milliy mazalı zatlar sawdasın da jolǵa qoyıwdı rejelestirgen. Kúnine 150-200 nan pisirip, ishki bazar hám dúkanlarda satıwdı baslap jibergen. Hár kúni tutınıwdaǵı nan óniminiń sawdasınan ayına 10 mln sumnan artıq dáramat alıw múmkin eken. Tek ǵana bunıń sır-sırın úyrenip, miynetinen qashpaw kerek deydi isbilermenimiz. Húrmetli Prezidentimizdiń hayal-qızlardıń jumısın jáne de nátiyjeli shólkemlestiriw boyınsha qabıl etip atırǵan párman hám qararları hár bir máhállede isbilermen hayal-qızlardıń óz jumısın baslawına, tek ǵana shańaraqtıń abadanlıǵın támiyinlewge emes, al aymaqlardıń rawajlanıwına da óziniń unamlı tásirin kórsetiwi menen áhmietli boldı. Hár bir tarawda belsendi hayal-qızlarımızdıń kúsh-ǵayratı bolsa órnek bolsa arzıydı desek, áyne haqıyqattı aytqan bolamız.