"Kásipler festivalı" hám "Miynet yarmarkası" ilajları dawam etpekte
2025-10-26 17:20:00 / Министрлик
Ámiwdárya rayonı 1-sanlı politexnikumında jaslar ushın áhmiyetli bolǵan "Kásipler festivalı" hám "Miynet yarmarkası" bolıp ótti.
Bul ilajdıń tiykarǵı maqseti - jaslarǵa zamanagóy kásipler dúnyasındaǵı jańalıqlardı tanıstırıw, olardıń kásipke bolǵan qızıǵıwshılıǵın arttırıw, sonday-aq, pitkeriwshi jaslardı jumıs penen támiyinlewden ibarat boldı.
Festival dawamında oqıwshılar hám qatnasıwshılar ushın túrli taraw wákilleri tárepinen kásiplik sheberlik kórgizbeleri, ámeliy sabaqlar shólkemlestirildi.
Miynet yarmarkasında bolsa rayonlıq Kámbaǵallıqtı qısqartıw hám bántlikke kómeklesiw orayı hám aymaqtaǵı kárxana hám shólkemler tárepinen bos jumıs orınları usınılıp, qatnasıwshılarǵa ózine múnásip jumıs ornın tańlaw imkaniyatı jaratıldı.
Ilaj sheńberinde jaslar óz qızıǵıwshılıǵına sáykes kásip tańlaw, tájiriybeli ustazlar menen sáwbetlesiw hám jumısqa ornalasıw ushın zárúr maǵlıwmatlardı alıw imkaniyatına iye boldı.
"Kásipler festivalı" hám "Miynet yarmarkası" jaslar ushın tek ǵana ámeliy tájiriybe maydanı emes, al keleshek kásibin tańlawda áhmiyetli jol-joba bolıp xızmet etpekte.